კოალიცია „ერთიანობა - ნაციონალური მოძრაობის" ზუგდიდის ორგანიზაციის თავმჯდომარის ანა წითლიძის განცხადებით, ე.წ. "ძალოვანთა შტაბი" მოქმედებს, რომელსაც სამხარეო პოლიციის უფროსი ხელმძღვანელობს და რომელიც ოპოზიციურად განწყობილ მოქალაქეებს პირადობის მოწმობებს ართმევს.

წითლიძემ ზუგდიდში გამართულ ბრიფინგზე კონკრეტული მაღალჩინოსნები დაასახელა და იმ პირების ფოტოები წარმოადგინა, რომლებიც ოპოზიციონერი დეპუტატის მტკიცებით, სენაკსა და ზუგდიდში ოპოზიციურად განწყობილი მოქალაქეებისთვის პირადობის მოწმობების ჩამორთმევით არიან დაკავებული, რათა არჩევნებზე ვერ მივიდნენ.

წითლიძის მიერ დასახელებულ პირებში პოლიციის მაღალჩინოსნები, სენაკის მერიისა და ა(ა)იპ-ების თანამშრომლები არიან.

„სენაკში პირადობის მოწმობების ჩამორთმევით დაკავებული ე.წ. "ძალოვანთა შტაბი" მოქმედებს, რომელსაც სამეგრელოს სამხარეო პოლიციის უფროსი გიგა ზესაშვილი ხელმძღვანელობს. ასევე სენაკში, პირადობის მოწმობების ჩამორთმევაში არიან მხილებული პოლიციის თანამშრომლები:

ბადრი გოგინავა - სამხარეო პოლიციის თანამშრომელი, ბუთხუზი სირია - ნოსირის პოლიციის განყოფილების უფროსი, კახა ჭაავა - ზანის განყოფილების უფროსი, ასევე, მერიისა და ა(ა)იპ-ის თანამშრომლები: ბეჟან გუნია, მონიკა ვასილევა, სოსო მატახერია, დათო საჯაია, თორნიკე ჯიჯეიშვილი.

ზუგდიდში პირადობის მოწმობების ჩამორთმევას ორგანიზებას უწევს დათო შენგელია, ე.წ. "ტყის ძმების" მეთაური, გია ყალიჩავა, პოლიციის თანამშრომელი, გიზო ვეკუა, "ოცნების" აქტივისტი, ირაკლი ჯიქია - შსს-ს თანამშრომელი და ლაშა ვეკუა - საპატრულო პოლიციის თანამშრომელი.

მივმართავ თითოეულ ამ ადამიანს: - ჩვენ გვაქვს მტკიცებულებები, როგორ აშინებთ მოსახლეობას. მათ ყველა საერთაშორისო ორგანიზაციას გადავცემთ. თქვენი მცდელობების მიუხედავად, "ერთიანობა-ნაციონალური მოძრაობა" 26 ოქტომბერს სამეგრელოში და მთელ საქართველოში იქნება გამარჯვებული პარტია და თქვენ მოგიწევთ, პასუხი აგოთ თქვენს უკანონო ქმედებებზე.

მოვუწოდებ შსს-ს მოახდინოს დაუყოვნებელი რეაგირება ზემოთაღნიშნული პირების უკანონო ქმედებებზე", - განაცხადა ანა წითლიძემ.