ბოლონიის პროცესის სამეთვალყურეო ჯგუფის (BFUG) გადაწყვეტილებით, საქართველო ბოლონიის პროცესის კვალიფიკაციების ექსპერტთა თემატური სამუშაო ჯგუფის (TPG A on QF) თანათავმჯდომარედ, ლატვიასთან და საფრანგეთთან ერთად, მეორე ვადით აირჩიეს. ამის შესახებ ინფორმაციას განათლების ხარისხის განვითარების ეროვნული ცენტრი ავრცელებს.

“2024 წლის სექტემბერში უნგრეთში, ქ. ბუდაპეშტში გამართულ სხდომაზე ბოლონიის სამეთვალყურეო ჯგუფმა ( BFUG) მიიღო ბოლონიის პროცესის განახლებული სამუშაო სტრუქტურა, რომელიც კვლავ მოიცავს ექსპერტთა თემატურ სამუშაო ჯგუფებს. აღნიშნულ სამუშაო შეხვედრაზე დადებითად შეფასდა 2021-2024 წლებში კვალიფიკაციების ექსპერტთა თემატური სამუშაო ჯგუფის (TPG A on QF) მუშაობა, რომელსაც თანათავმჯდომარის რანგში კოორდინაციას უწევდა სსიპ - განათლების ხარისხის განვითარების ეროვნული ცენტრი.

შესაბამისად, სსიპ - განათლების ხარისხის განვითარების ეროვნული ცენტრი შემდეგი 4 წლის განმავლობაში კვლავ კოორდინაციას გაუწევს ბოლონიის პროცესის ძირითადი ვალდებულებების დანერგვას წევრ ქვეყნებში”, - ნათქვამია ინფორმაციაში.