2012 წლამდე საქართველოს მართავდა უსამშობლო პოლიტიკოსების, უცხოელი აგენტების ავტორიტარული რეჟიმი, რომელიც კლავდა და აწამებდა ადამიანებს, ძარცვავდა ბიზნესს, იტაცებდა ტელევიზიებს, - ამის შესახებ „ქართული ოცნების“ საარჩევნო შტაბის ხელმძღვანელმა, პრემიერ-მინისტრმა ირაკლი კობახიძემ ზუგდიდში, საარჩევნო კამპანიის რეგიონულ ღონისძიებაზე შეკრებილ მოსახლეობასთან განაცხადა.

კობახიძის თქმით, „ნაციონალურმა მოძრაობამ“ 2008 წელს, ქვეყანა ომში ჩართო და დაგვაკარგვინა ქვეყნის ტერიტორიების 20 პროცენტი.

მთავრობის მეთაურის თქმით, ხალხს დაკარგული ჰქონდა ყოველგვარი იმედი, რომ ვითარება რაიმეს ან ვინმეს შეიძლებოდა შეეცვალა.

„სწორედ ამ დროს პოლიტიკურ ცხოვრებაში „ქართული ოცნების“ დამფუძნებელი, ბატონი ბიძინა ივანიშვილი გამოჩნდა, რომელმაც ჩვენი ქვეყნის განვითარებაში დემოკრატიული გარდატეხა შეიტანა და საქართველო განვითარების სწორ გზაზე დააყენა. სწორედ, ბიძინა ივანიშვილის დამსახურებაა ყველა ის გარდამტეხი ცვლილება, რომელსაც საქართველომ დემოკრატიის, ადამიანის უფლებების, ეკონომიკის, ევროინტეგრაციის, უსაფრთხოების და მრავალი სხვა მიმართულებით მიაღწია. კიდევ ერთხელ მინდა ვისარგებლო შემთხვევით და ამისთვის მადლობა გადავუხადო ბატონ ბიძინა ივანიშვილს“,- განაცხადა ირაკლი კობახიძემ.