აშშ-ის პრეზიდენტი, ჯო ბაიდენი მიმდინარე კვირაში ბერლინში გერმანიის კანცლერთ ოლაფ შოლცთან, საფრანგეთის პრეზიდენტ ემანუელ მაკრონთან და გაერთიანებული სამეფოს პრემიერ-მინისტრ კირ სტარმერთან შეხვედრას გამართავს, - ინფორმაციას CNN-ი ავრცელებს.

აღნიშნული ოთხი ლიდერი წინა კვირას „რამშტაინის“ საავიაციო ბაზაზე უკრაინის პრეზიდენტ ვოლოდიმირ ზელენსკისთან შეხვედრას გეგმავდა. თუმცა, ეს შეხვედრა იმის გამო ჩაიშალა, რომ ჯო ბაიდენმა ქარიშხალ „მილტონის“ გამო გერმანიაში ვიზიტი გადადო. რაც შეეხება ვოლოდიმირ ზელენსკის, ის გერმანიაში მაინც გაემგზავრა, კანცლერ ოლაფ შოლცს შეხვდა და მისგან 1.5 მილიარდი დოლარის ოდენობის ახალი დახმარების დაპირებაც მიიღო.

CNN-ი ხაზს უსვამს, რომ კიელის მსოფლიო ეკონომიკის ინსტიტუტის მონაცემებით, შეერთებული შტატები, გერმანია, გაერთიანებული სამეფო და საფრანგეთი უკრაინისთვის იარაღის კრიტიკულად მნიშვნელოვანი მიმწოდებლები არიან და 2022 წლის თებერვლიდან ქვეყანას, დაახლოებით, 90 მილიარდი აშშ დოლარის ღირებულების პირდაპირ სამხედრო დახმარება გაუწიეს.