არ ვიცი, რა უნდა ვთქვა ამ ადამიანზე. იმ რადიკალური დაჯგუფების ერთ-ერთი ჩვეულებრივი რიგითი წარმომადგენელია, -ამის შესახებ თბილისის მერმა კახა კალაძემ პრეზიდენტ სალომე ზურაბიშვილის მიერ არჩევნებამდე ე.წ. ტექნიკური მთავრობის დასახლებასთან დაკავშირებით განაცხადა.

კალაძის თქმით, 26 ოქტომბერს ყველაფერს პასუხს ქვეყნის მოსახლეობა გასცემს.

„არ ვიცი, რა უნდა ვთქვა ამ ადამიანზე. იმ რადიკალური დაჯგუფების ერთ-ერთი ჩვეულებრივი რიგითი წარმომადგენელია. ის განცხადებები, ქმედებებიც პირდაპირ წინააღმდეგობაში მოდის კონსტიტუციასთან და უკვე არანაირი ზღვარი არ არსებობს, ყველაფერს გადააბიჯა. მათ, ყველას თავიანთ პატრონებთან ერთად ჩვენი ქვეყნის მოსახლეობა გასცემს შესაბამის პასუხს“. განაცხადა კალაძემ

შეგახსენებთ, საქართველოს პრეზიდენტმა სალომე ზურაბიშვილმა განაცხადა, რომ 26 ოქტომბრის საპარლამენტო არჩევნებამდე ის ე.წ. ტექნიკურ მთავრობას წარადგენს. როგორც ზურაბიშვილმა განმარტა, არჩევნებამდე „ტექნიკური მთავრობის“ წარდგენის მიზანი არის ის, რომ საზოგადოებამ იცოდეს, ვინ იქნება პასუხისმგებელი მთავრობაში.

„საჭიროა, საზოგადოებამ იცოდეს, როცა ხმას მისცემს, რომელ პარტიას აძლევს ხმას და რომელი პარტია არის სრულიად ბოლომდე, თანმიმდევრობით ამ ქარტიის უკან“, - აღნიშნა პრეზიდენტმა.