ბევრი არ არის მოლდოვის პრეზიდენტის, მაია სანდუს იდეოლოგიის მომხრე, ეს ფაქტი ყურადღებას იპყრობს, - ამის შესახებ რუსეთის პრეზიდენტის პრესსპიკერმა, დიმიტრი პესკოვმა მოლდოვაში ჩატარებულ საპრეზიდენტო არჩევნებზე კომენტირებისას განაცხადა.

მისი მტკიცებით, მოლდოვაში ოპოზიციურ ძალებს ქვეყანაში საარჩევნო პროცესის დროს საარჩევნო კამპანიის თავისუფლად წარმართვის შესაძლებლობა ჩამოერთვათ.

„ასეთი არათავისუფალი საარჩევნო კამპანიის პირობებშიც კი ვხედავთ, რამდენი ადამიანი არ არის ამჟამინდელი პრეზიდენტის სანდუს იდეოლოგიის მომხრე. ეს ყურადღებას იპყრობს“, - აღნიშნა პესკოვმა.

ცნობისთვის, საარჩევნო უბნებიდან ოქმების 98,51%-ის დამუშავების შემდეგ მოლდოვას ცესკო-ს მიერ გავრცელებული წინასწარი მონაცემებით, არჩევნებში მოქმედი პრეზიდენტი, მაია სანდუ ხმების 42,07%-ით ლიდერობს, მეორე ადგილზეა ყოფილი გენერალური პროკურორი, ალექსანდრე სტოიანოგლო, ხმების 26,27%-ით. მოლდოვას პრეზიდენტობისთვის 11 კანდიდატი იბრძოდა, მათგან ვერცერთმა ვერ მიიღო ხმების 50%-ზე მეტი, რაც ნიშნავს, რომ არჩევნების მეორე ტური ჩატარდება.