საქართველოს ჟურნალისტური ეთიკის ქარტიის საბჭომ 22 ოქტომბერს განიხილა საერთო სამოქალაქო მოძრაობა „მრავალეროვანი საქართველოს“ განცხადება POSTV-ის ჟურნალისტის, გურანდა ბილიხოძის წინააღმდეგ და ქარტიის საბჭომ მიიჩნია, რომ სადავო მასალებში ჟურნალისტური ეთიკის პრინციპები დაირღვა.

ამის შესახებ ინფორმაციას „მრავალეროვანი საქართველო“ ავრცელებს.

„სადავო მედია პროდუქტი „POSTV - ანალიტიკას“ „ფეისბუქ“ გვერდზე 11 და 14 ოქტომბერს გამოქვეყნდა და ოპოზიციონერ პოლიტიკოსს, მამუკა ხაზარაძეს ეხებოდა. POSTV-ს მასალების მიხედვით, მამუკა ხაზარაძე მალავდა მის არაქართულ წარმომავლობას.

მრავალეროვანი საქართველო დავობდა ქარტიის პირველი (სიზუსტე), მეშვიდე (დისკრიმინაცია) და მე-11 (ფაქტის განზრახ დამახინჯება) პრინციპების დარღვევაზე.

მოპასუხე მხარემ საქმეზე წარმოადგინა შეპასუხება და განმცხადებლის პრეტენზიებს არ დაეთანხმა.

ქარტიის საბჭომ მიიჩნია, რომ სადავო მასალებში სამივე სადავო პრინციპი დაირღვა“, - აღნიშნულია ინფორმაციაში.