აშშ-ის თავდაცვის მინისტრმა ლოიდ ოსტინმა ისრაელელ კოლეგასთან, იოავ გალანტთან საუბრისას განაცხადა, რომ ისრაელმა უნდა გამოიყენოს შესაძლებლობა ცეცხლის შეწყვეტისა და მძევლების გათავისუფლების შეთანხმების მისაღწევად, - ამის შესახებ პენტაგონის პრესსპიკერმა, გენერალ-მაიორმა პეტ რაიდერმა განაცხადა.

„მინისტრმა ოსტინმა მოუწოდა ისრაელის მთავრობას, გადადგას ყველა საჭირო ნაბიჯი ღაზაში მძიმე ჰუმანიტარული სიტუაციის მოსაგვარებლად და იმუშაოს მძევლების გათავისუფლებისა და ცეცხლის შეწყვეტის შესაძლებლობის გამოსაყენებლად, რომელიც იაჰია სინვარის სიკვდილის შემდეგ გაჩნდა“, - აღნიშნა რაიდერმა.

მისი თქმით, სატელეფონო საუბრისას ოსტინმა ასევე გამოხატა შეშფოთება ლიბანის შეიარაღებულ ძალებზე ისრაელის თავდასხმების შესახებ ცნობებთან დაკავშირებით და ხაზი გაუსვა როგორც ლიბანის არმიის, ასევე გაერო-ს სამშვიდობოების უსაფრთხოების უზრუნველსაყოფად ნაბიჯების გადადგმის მნიშვნელობას.