სახეზეა ის მრავალჯერადი უპირატესობა, რაც “ქართულ ოცნებას“ აქვს. მოლოდინი არის დამაჯერებელი გამარჯვების, რათა შემდგომში ქვეყანა განვითარდეს, - ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ მთავრობის ადმინისტრაციაში გამართულ პრესკონფერენციაზე ჟურნალისტებს განუცხადა, როდესაც თბილისში “ქართული ოცნების” მიერ გამართულ შემაჯამებელ წინასაარჩევნო ღონისძიებას გამოეხმაურა.

ქარსელაძის თქმით, გუშინდელი შეკრება “ძალიან ემოციური და თბილი იყო”.

„ძალიან ემოციური იყო. დიდი მუხტი მოდიოდა. ჩვენი ასეულობით ათასი მხარდამჭერი ჩვენს მხარდამხარ ესწრებოდა შეხვედრას, სადაც მხარდაჭერას გამოხატავდნენ „ქართული ოცნებისადმი“, ჩვენი კურსისადმი და მნიშვნელოვანი შედეგების შემდგომი განვითარებისადმი, იმ ძირითადი პოსტულატების გათვალისწინებით, რაც აუცილებელია, რათა ქვეყანა წინ წავიდეს, რა თქმა უნდა, მშვიდობით, ღირსებით, კეთილდღეობით და რა თქმა უნდა, აუცილებლად, ევროპისკენ.

ეს არის გზა, რაც გასავლელი გვაქვს, რათა მომზადებული ვიყოთ ყველა მიმართულებით, რითიც აუცილებლად დავბრუნდებით ევროპულ ოჯახში და არა ხელცარიელები, არამედ დახუნძლული შედეგებით. ბევრი ადამიანი იყო. ძალიან თბილი ღონისძიება იყო - ვგულისხმობ განწყობას და მხარდაჭერას. რა თქმა უნდა, სახეზეა ის მრავალჯერადი უპირატესობა, რაც „ქართულ ოცნებას“ აქვს. მოლოდინი არის დამაჯერებელი გამარჯვების, რათა ქვეყანა შემდგომში განვითარდეს“,- განაცხადა ირაკლი ქარსელაძემ.