მსოფლიო ეკონომიკური აღდგენის შემდეგი ტალღა გლობალური სამხრეთისა და აღმოსავლეთის ქვეყნებში ჩნდება, ამიტომ დროა ვიფიქროთ საკუთარი პლატფორმის შექმნაზე BRICS-ის ქვეყნების მზარდი ეკონომიკის პოტენციალის გასახსნელად, - ამის შესახებ რუსეთის პრეზიდენტმა, ვლადიმერ პუტინმა BRICS-ის სამიტის დასკვნით შეხვედრაზე განაცხადა.

„მნიშვნელოვანია ალტერნატიული, საიმედო და ყოველგვარი დიქტატისგან თავისუფალი მრავალმხრივი ფინანსური მექანიზმების, საწარმოო და ლოგისტიკური ჯაჭვების შექმნა, ტექნოლოგიებისა და მოწინავე ცოდნის გაცვლის დამყარება, ახალი საერთაშორისო სატრანსპორტო დერეფნების შესაძლებლობების განვითარება და გაზრდა“, - აღნიშნა პუტინმა.

მისი განმარტებით, ამ საინვესტიციო პლატფორმის მიზანია გაზარდოს საინვესტიციო ნაკადები BRICS-ის ქვეყნებში, გლობალურ სამხრეთსა და აღმოსავლეთში და ფოკუსირება მოახდინოს დიდ ინფრასტრუქტურულ და ტექნოლოგიურ პროექტებში ინვესტიციებზე.