რუსებმა ქალაქ დნიპროზე სარაკეტო დარტყმა განახორციელეს, რის შედეგადაც, 3 ადამიანი დაიღუპა და 19 დაშავდა, - ამის შესახებ ინფორმაციას უკრაინული მედია დნეპროპეტროვსკის საოლქო-სამხედრო ადმინისტრაციის ხელმძღვანელზე, სერგეი ლისაკზე დაყრდნობით ავრცელებს.

„დნიპროზე სარაკეტო დარტყმა განხორციელდა. საცხოვრებელი კორპუსები დაზიანდა და ხანძარი გაჩნდა“, - აცხადებს სერგეი ლისაკი.

ლისაკის ცნობით, დაშავებულებს შორის 4 ბავშვია, 8 ადამიანი კი საავადმყოფოში გადაიყვანეს.

ამასთან, უკრაინული მედიის ინფორმაციით, გუშინ საღამოს, რუსულმა ძალებმა კიევის მიმართულებით დრონები გაუშვეს. რუსული დრონი კიევში საცხოვრებელ კორპუსს შეეჯახა და ერთ-ერთ ბინაში ხანძარი გაჩნდა, რის შედეგადაც ერთი მოზარდი გოგონა დაიღუპა და 6 ადამიანი დაშავდა.