წინასწარი მონაცემებით, თელავში „ქართულმა ოცნებამ“ ხმების 55% მიიღო. თელავის #17 ოლქში შემავალი 43 საარჩევნო უბნიდან, 33 საარჩევნო უბანზე არჩევნები ჩატარდა ელექტრონული წესით, ხოლო 10 უბანზე ძველი წესით.

როგორც საოლქო-საარჩევნო კომისიის თავმჯდომარემ, რევაზ გაიპარაშვილმა განაცხადა, „თელავში არჩევნები გამჭვირვალე და მშვიდ ვითარებაში ჩატარდა”.

მისივე ინფორმაციით, #17 ოლქში დაწერილია მხოლოდ ერთი საჩივარი.

„უცხოელი დამკვირვებლები გაოცებულები არიან პროცესის გამჭვირვალობით და ორგანიზებით. საჩივრებს რაც შეეხება, ერთადერთი საჩივარია, რომელიც დაიწერა მხოლოდ იმის გამო, რომ ამომრჩეველმა კაბინაში გადაიღო ფოტოსურათი. ფაქტთან დაკავშირებით მოხდა თავმჯდომარის მყისიერი რეაგირება”, - განაცხადა რევაზ გაიპარაშვილმა.

თელავის მუნიციპალიტეტში საპარლამენტო არჩევნებში რეგისტრირებულია 54 572 ამომრჩეველი, საარჩევნო უბანზე გამოცხადდა 31 105 ამომრჩეველი, რაც 57% შეადგენს.