მთავარი მიზანი, რაც მათ [ოპოზიციას ჰქონდათ, რომ ხელისუფლება გადაებარებინათ მათი უცხოელი დამკვეთებისთვის, ვერ შეასრულეს - ახლა ვხედავთ კოორდინირებულ კამპანიას იმისთვის, რომ თავს დაესხან ქართველ ამომრჩეველს და წაართვან მათი არჩევანი, - ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ოპოზიციის წარმომადგენლებმა ქართველი ხალხისგან „საკუთარი უსამშობლოობის გამო პასუხი მიიღეს“.

„მთავარი მიზანი, რაც მათ [ოპოზიციას] ჰქონდათ, რომ ხელისუფლება გადაებარებინათ მათი უცხოელი დამკვეთებისთვის, ვერ შეასრულეს. ახლა ვხედავთ კოორდინირებულ კამპანიას იმისთვის, რომ თავს დაესხან ქართველ ამომრჩეველს და წაართვან მათი არჩევანი. მათ შორის, სასაცილო იყო, რაც 26 ოქტომბერს საღამოს ვნახეთ, მათი გუნება-განწყობის ცვლილება. კიდევ ერთხელ შეგახსენებთ, რომ „ედისონ რისერჩმა“ ეგზიტპოლი გააყალბა...

სცენა აწყობილი ჰქონდათ და რატომ არ ავიდნენ იმ სცენაზე? რატომ დაშალეს ის სცენა და წავიდნენ? ღამის 01:30 საათზე ეთერები რატომ შეწყვიტეს და რატომ წავიდნენ და დაიძინეს? ასე იქცევა ის ჯგუფი, რომელიც მართლა ფიქრობს, რომ გაყალბდა რამე? - აქ რამე, რომ გაყალბებულიყო ქართველ ამომრჩეველს რა შეაჩერებდა, ან თუნდაც მაგ ოპოზიციას რა შეაჩერებდა პროტესტისგან?! მაგრამ ისინი წავიდნენ და 01:30 საათზე ტკბილად და მშვიდად დაიძინეს. იმიტომ, რომ იციან, რომ ქართველი ხალხისგან საკუთარი უსამშობლოობის გამო პასუხი მიიღეს. სინამდვილეში, ეს განაჩენია.

როდესაც 43%-იანი სხვაობაა, პირველ ადგილოსან „ქართულ ოცნებასა“ და შემდეგ ადგილოსანს შორის, ეს არის განაჩენი, რომელიც ქართველმა ხალხმა ამ ოპოზიციას ყველაფრისთვის [გამოუტანა]. ისინი აპირებდნენ, რომ სანქციები დაეწესებინათ, იმისთვის, რომ ისინი საქართველოს ინტერესებს სხვებზე ყიდიან. იმისთვის, რომ ისინი აპირებდნენ ამ ქვეყნის ომში ჩათრევას, იმიტომ, რომ ისინი იტყუებიან მარცხნივ და მარჯვნივ. იმისთვის, რაც მათ პარლამენტში გააკეთეს, [ხალხმა] პასუხი გასცა და სამარცხვინო ადგილი დემოკრატიულ სივრცეში მიუჩინა“, - განაცხადა პაპუაშვილმა.