ლევან დავითაშვილი - Concentrix-ის ხელმძღვანელობასთან რეგულარული კომუნიკაცია აქვს სააგენტოს „აწარმოე საქართველოში“ - კომპანიის ხელმძღვანელობა სრულად გაგებით ეკიდება საგამოძიებო მოქმედებებს
Concentrix-ის ხელმძღვანელობასთან რეგულარული კომუნიკაცია აქვს „აწარმოე საქართველოში“, მე რამდენადაც მაქვს ანგარიში და კომპანიის ხელმძღვანელობა სრულად გაგებით ეკიდება საგამოძიებო მოქმედებებს, - ამის შესახებ საქართველოს ეკონომიკისა და მდგრადი განვითარების მინისტრმა ლევან დავითაშვილმა განაცხადა.
მისი თქმით, საგამოძიებო მოქმედებები შესაძლოა თავად კომპანიისთვისაც საინტერესო ინფორმაციის წყარო იყოს.
„მე მოვიკითხე საგამოძიებო სამსახურებთან, მიდის საგამოძიებო პროცესი და ვიდრე ეს არ დასრულდება, უფრო მეტ ინფორმაციას ვერ მოგაწვდით, იმიტომ, რომ მეც არ მაქვს მეტი ინფორმაცია. პროცესი მიდის და აუცილებელია იმისთვის, რომ საგამოძიებო სამსახურებმა თქვან თავიანთი პასუხი და გააკეთონ შეფასება იმ პროცესის, რომელიც მიმდინარეობს. კომპანიის ხელმძღვანელობასთან რეგულარული კომუნიკაცია აქვს „აწარმოე საქართველოში“, მე რამდენადაც მაქვს ანგარიში და კომპანიის ხელმძღვანელობა სრულად გაგებით ეკიდება საგამოძიებო მოქმედებებს. პირიქით, მათთვისაც ეს შეიძლება იყოს მნიშვნელოვანი ინფორმაციის წყარო, იმიტომ, რომ ეს არის კომპანია, რომელსაც საერთაშორისო მასშტაბით წარმომადგენლობები აქვს და ეს მათთვისაც ძალიან მნიშვნელოვანია რეპუტაციის შესანარჩუნებლად,“ - განაცხადა დავითაშვილმა.
ცნობისთვის, თბილისში, ვაკე პლაზაში მდებარე ამერიკულ კომპანია Concentrix Georgia-ში ფინანსთა სამინისტროს საგამოძიებო სამსახურის თანამშრომლები შევიდნენ.
