ჩემი პირადი მომავალი არ არის ისეთი მნიშვნელოვანი, როგორიც საქართველოს მომავალი, - ამის შესახებ საქართველოს პრეზიდენტმა, სალომე ზურაბიშვილმა CNN-თან ინტერვიუში განაცხადა.

„ამ ყველაფრის შედეგი ორმხრივია. პირველ რიგში, არის მოწოდებები საერთაშორისო გამოძიების შესახებ, რათა აქ შეგროვებული მტკიცებულებები შეივსოს, რათა გლობალური სურათის, მანიპულაციისა და დაშინების მასობრივი სურათის ჩვენება მოხდეს. შემდეგ, სავარაუდოდ, იქნება ზეწოლა ევროპისა და აშშ-ის მთავრობების მხრიდან, რომლებიც ასევე, საერთაშორისო გამოძიებას მოითხოვენ, ხელისუფლებაზე ზეწოლა, რომ არჩევნების შედეგების გადახედვა და გადასინჯვა მოხდეს. თუ ეს დროულად არ მოხდა, მაშინ მოწოდება სავარაუდოდ, ახალი არჩევნების ჩატარების შესახებ იქნება, მაგრამ ეს პოლიტიკური პარტიებისა და მოსახლეობის გადასაწყვეტია“, - უპასუხა სალომე ზურაბიშვილმა კითხვაზე, თუ რა შედეგს მოელის საპროტესტო აქციებიდან.

ამასთან, კითხვაზე, ხომ არ ღელავს საკუთარი მომავლის შესახებ, თუ არჩევნების შედეგების მიხედვით „ქართულ ოცნებას“ გამარჯვება დარჩება, სალომე ზურაბიშვილმა აღნიშნა, რომ ის ქვეყნის მომავალზე ღელავს.

„მე არ ვღელავ საკუთარ მომავალზე, როცა მთელ ქვეყანაზე ვღელავ და იმაზე, თუ საით შეიძლება წავიდეს იგი, თუ ყველაფერი „ქართული ოცნების“ ხელში დარჩება. რაც მათ საარჩევნო პროგრამაში თქვეს არის ის, რომ ციხეში ჩასვამენ ყველას, რომ აკრძალავენ ოპოზიციურ პარტიებს, რომ სრულად აღასრულებენ „უცხოური აგენტების შესახებ კანონს“, რაც ხელს შეუშლის არა მხოლოდ არასამთავრობო ორგანიზაციებს, რომლებიც საერთაშორისო ორგანიზაციებთან თანამშრომლობენ, არამედ ჰუმანიტარულ ორგანიზაციებსაც, რამაც შეიძლება ჩვენი იმიგრირებული თემებიდან საქართველოში გადმორიცხვებს ხელი შეუშალოს. ეს არის „ქართული ოცნების“ პროგრამა. ასე რომ, ჩემი პირადი მომავალი არ არის ისეთი მნიშვნელოვანი, როგორც საქართველოს მომავალია და ეს არის ის, რაც ჩვენს პარტნიორებს, ევროპელსაც და ამერიკელსაც, ჩემს მომავალზე მეტად უნდა აწუხებდეთ“, - აღნიშნა საქართველოს პრეზიდენტმა.