საქართველოს არჩევნებში თაღლითობა რუსეთის მიერ ევროკავშირის სამეზობლოში ჩარევის უფრო ფართო ჩარჩოს ნაწილია, - ამის შესახებ ევროპის საკითხებში საფრანგეთის მინისტრმა, ბენჟამინ ჰადადმა საფრანგეთის სენატის საგარეო ურთიერთობათა კომიტეტის სხდომაზე განაცხადა.
„დამკვირვებლებმა ძალიან ცხადად თქვეს: ეს არ იყო თავისუფალი და სამართლიანი არჩევნები…
ძალიან ცხადად უნდა ვთქვათ, საქართველო გასული წლიდან არის ევროკავშირის კანდიდატი ქვეყანა, ამას მოჰყვება მოთხოვნები და ვალდებულებები კანონის უზენაესობასთან და არჩევნების სამართლიანობასთან დაკავშირებით. „ქართული ოცნების“ არალიბერალური გადახრის გაგრძელება ზიანის მომტანი იქნება ევროპული პერსპექტივისთვის, რომელიც [საქართველოს] მოსახლეობის აბსოლუტურ უმრავლესობას სურს“, - განაცხადა ჰადადმა.
მინისტრმა აღნიშნა, რომ საქართველოს არჩევნებში დაფიქსირებული თაღლითობები ნაწილია უფრო ფართო „რუსეთის ჩარევის ჩვენს სამეზობლოში”. მისი თქმით, საქართველოში რუსეთის ჩარევის შედეგად „თავდასხმის ქვეშაა ევროპის იდეა, ჩვენი ინტერესები, ჩვენს საზღვრებთან ქვეყნების სტაბილურობა”.
ფრანგმა მინისტრმა აღნიშნა, რომ საქართველოს ევროკავშირში გაწევრიანებასა და ამისთვის საჭირო მაღალი სტანდარტების მოთხოვნას შორის შეუთავსებლობა არ არსებობს.
„პირიქით, სწორედ იმიტომ, რომ მათ [საქართველომ] გადაწყვიტეს გაწევრიანების განაცხადი გაეკეთებინათ, მაგას მოჰყვება განსაკუთრებული ვალდებულებები“, - განაცხადა ჰადადმა.
