კოალიცია „ძლიერი საქართველო“ ხელისუფლებას მიმართავს, რომ გასაჯაროვდეს მონაცემები იმის შესახებ, თუ ვინ მიიღო მონაწილეობა 26 ოქტომბრის საპარლამენტო არჩევნებში.

როგორც კოალიციის ერთ-ერთმა წევრმა, ლევან სამუშიამ კოალიციის სხვა წევრებთან ერთად გამართულ ბრიფინგზე განაცხადა, ამ მონაცემების გასაჯაროებით დადგინდება მასობრივად მიიტაცა თუ არა არჩევნები ხელისუფლებამ.

„ვითხოვთ, რომ გასაჯაროვდეს ის, თუ ვინ მიიღო არჩევნებში მონაწილეობა. სერიოზული ეჭვი არსებობს იმასთან დაკავშირებით, რომ ადამიანები, ვინც მონაწილეობდნენ არჩევნებში, საერთოდ არ ყოფილან საარჩევნო უბნებზე და ხშირ შემთხვევაში, საქართველოში არ იმყოფებოდნენ. თუ ეს, ასე არ არის, მივმართავ რუსულ ხელისუფლებას, რისი გეშინიათ?! ჩვენ ვითხოვთ, სამართლებრივ მოქმედებებს, გაიხსნას ე.წ. შავი ყუთი და ვახოთ და ნახოს საზოგადოებამ, ჩაიდინეთ თუ არა სისხლის სამართლის დანაშაული, მასობრივად მიიტაცეთ თუ არა არჩევნები, გამოიყენეთ თუ არა უბანზე არ არსებული, ქვეყანაში არ არსებული ადამიანების ხმები და მათ ნაცვლად მიაცემინეთ თუ არა სხვებს ხმები. აქედან გამომდინარე, ვითხოვთ, ე.წ. სამაგიდო სიების, ე.წ. ვერიფიკაციის აპარატიდან ამობეჭდილი ხელმოწერილი ქვითრების გასაჯაროებას, სადაც ნათლად დადასტურდება, რომ ადამიანი, რომელმაც სხმა მისცა და ყუთში ჩავარდა მისი ხმა იმყოფებოდა, თუ არა უბანზე ან იმყოფებოდა თუ არა საქართველოში. თქვენ ამის გეშინიათ, თქვენ ამას არ აკეთებთ და ყველაფერს აკეთებთ იმისთვის, რომ მტკიცებულებები არ გასაჯაროვდეს და დაიმალოს. ჩვენ, „ძლიერი საქართველო“ მოგმართავთ ეს ყველაფერი, წინააღმდეგ შემთხვევაში, თქვენი ქმედებით პირდაპირ იღებთ პასუხისმგებლობას ჩადენილ სისხლის სამართლის ამ დანაშაულზე“, - განაცხადა ლევან სამუშიამ.