კოალიცია “ძლიერი საქართველოს” შტაბში ოპოზიციური პარტიების წარმომადგენლებს შორის შეხვედრები მიმდინარეობდა. აღნიშნულის შესახებ „ძლიერი საქართველოს“ ერთ-ერთმა ლიდერმა, გიორგი სიორიძემ ჟურნალისტებს განუცხადა.

გიორგი სიორიძის განმარტებით, ერთ-ერთ შეხვედრაზე განიხილებოდა საარჩევნო დღეს მიმდინარე დარღვევებთან დაკავშირებული საკითხები.

“არჩევნებიდან ერთი კვირის თავზე ძალიან სერიოზული მასალა არის შეგროვილი, დამუშავებული, დახარისხებული. მუშაობს ყველა ოპოზიციური პარტია, არასამთავრობო სექტორი, რომლებიც წერენ ყველა იმ დარღვევის შესახებ, ასევე, როგორც მოგეხსენებათ გაშიფრულია სქემები. ეს ყველაფერი მიეწოდება ჩვენს საერთაშორისო პარტნიორებს - იმ სქემების, მტკიცებულებების შესახებ სრული ინფორმაცია, რომელიც ამ ინტენსიური და ძალიან სერიოზული სამუშაოს შედეგად იქნა მიღებული.

[აღნიშნულ შეკრებაში მონაწილეობდნენ] ადამიანები, რომლებიც არიან ყველა ბარიერ გადალახული ოპოზიციური პარტიის შესაბამისი პირები, იურისტები, საარჩევნო სპეციალისტები და ა.შ.”, - განაცხადა სიორიძემ.