მკაფიო გზავნილი უნდა გავუგზავნოთ ივანიშვილს, რომ სისტემა დამპალია, თევზი თავიდან ლპება. ამ ჭიშკარს კი არ გავუკეთებთ დემონტაჟს, შენ გაგიკეთებთ დემონტაჟს ივანიშვილო შენს ხალხთან ერთად - ჩვენ თითქოს ცხვრების ფარა ვართ აქ და უნდა ვიცხოვროთ ამის ნება-სურვილზე, ასეა არ იქნება! - ამის შესახებ „ძლიერი საქართველოს“ ლიდერმა მამუკა ხაზარაძემ თბილისის სააპელაციო სასამართლოსთან მიმდინარე საპროტესტო აქციაზე სიტყვით გამოსვლისას განაცხადა.

როგორც ხაზარაძემ აღნიშნა, ხვალ თბილისის სააპელაციო სასამართლოსთან კიდევ უფრო მეტი ადამიანი უნდა მივიდეს, რათა პროტესტი გამოხატოს.

„მეგობრებთან ერთად, თქვენთან ერთად 24 საათი, 7 დღის განმავლობაში, ყოველკვირა ვიქნებით იქ, სადაც სიმართლეს დაცვა სჭირდება, ადამიანს გვერდში დგომა, მაგარ მოსამართლეებს და მებრძოლ ადამიანებს! ხვალ აქ სხდომაა ჩანიშნული. უფრო დიდი პროტესტით გამოვიდეთ და დავუჭიროთ მხარი. ვანახოთ, რომ ის საქართველო, რომელიც ამ სასამართლოს კედლებშია, საქართველოს სასამართლო არ არის, რუსული, დაჭაობებული სასამართლოა. მკაფიო გზავნილი უნდა გავუგზავნოთ ივანიშვილს: სისტემა დამპალია, თევზი თავიდან ლპება, ამ ჭიშკარს კი არ გავუკეთებთ დემონტაჟს, შენ გაგიკეთებთ დემონტაჟს ბიძინა ივანიშვილო შენს ხალხთან ერთად, რომელიც ერთი რამით არის დაინტერესებული, რომ ძალაუფლება შეინარჩუნონ, კორუფცია. ჩვენ, თითქოს ცხვრების ფარა ვართ აქ და უნდა ვიცხოვროთ ამის ნება-სურვილზე, ასეა არ იქნება! გარანტიას გაძლევთ! არც არასდროს იყო ასე! ბრძოლა ახლა იწყება გამარჯვება ჩვენს ხელშია“,- აღნიშნა ხაზარაძემ.

გარდა ამისა ის იმ ფაქტს გამოეხმაურა, რომ თეთრიწყაროს სასამართლომ ხმის ფარულობის დარღვევა დაადასტურა.

როგორც ხაზარაძემ განაცხადა, „ბევრი ხუჭუა გვჭირდება ჩვენ, ბევრი ასეთი ადამიანი გვჭირდება, რომელიც გამოვა და ხმას აიმაღლებს“.