გერმანიის კანცლერმა ოლაფ შოლცმა და საფრანგეთის პრეზიდენტმა ემანუელ მაკრონმა სატელეფონო საუბარში აშშ-ის საპრეზიდენტო არჩევნები განიხილეს, - ამის შესახებ ინფორმაციას სააგენტო „ფრანს-პრესი“ გერმანიის კანცლერის პრესსპიკერზე, შტეფენ ჰებესტრეიტზე დაყრდნობით ავრცელებს.

„შეთანხმდნენ, რომ ამ საკითხთან დაკავშირებით მჭიდროდ ითანამშრომლონ“, - განაცხადა გერმანიის კანცლერის პრესსპიკერმა.

ამასთან, საფრანგეთის პრეზიდენტმა, ემანუელ მაკრონმა დონალდ ტრამპს არჩევნებში გამარჯვება მიულოცა.

„პრეზიდენტ დონალდ ტრამპს ვულოცავ. ჩვენ მზად ვართ ერთად ვიმუშაოთ, როგორც ამას ოთხი წელი ვაკეთებდით. რწმენით, პატივისცემითა და ამბიციით. მეტი მშვიდობისა და კეთილდღეობისთვის“, - წერს საფრანგეთის პრეზიდენტი სოციალურ ქსელში.

ოლაფ შოლცმა აღნიშნა, რომ გერმანიასა და აშშ-ს თანამშრომლობის ხანგრძლივი ისტორია აქვთ.

„დონალდ ტრამპს აშშ-ის პრეზიდენტად არჩევას ვულოცავ. გერმანიასა და ამერიკის შეერთებულ შტატებს წარმატებული თანამშრომლობის ხანგრძლივი ისტორია აქვთ, რაც ოკეანის ორივე მხარეს კეთილდღეობასა და თავისუფლებას ხელს უწყობს. ჩვენ ამის გაკეთებას ჩვენი მოქალაქეების საკეთილდღეოდ გავაგრძელებთ“, - განაცხადა გერმანიის კანცლერმა.