"ქართულმა ოცნებამ" მაინც ვერ მოიგო თბილისი, დამარცხდნენ, ამიტომ საპროტესტო აქციები თბილისიდან უნდა დავიწყოთ და ყოველდღიურად უნდა შევუქმნათ დისკომფორტი ხელისუფლებას, - ამის შესახებ საპროტესტო მსვლელობისას კოალიცია "ძლიერი საქართველოს" წევრმა ლანა გალდავამ განაცხადა.

მისი თქმით, აქციებისა და მსვლელობების მიზანი ხელისუფლებისთვის დისკომფორტისა შექმნა და ქვეყანაში ხელახალი საპარლამენტო არჩევნების ჩატარებაა.

"ჩვენ, ოპოზიციამ მოვიგეთ არჩევნები, ჩვენმა ხალხმა მოიგო არჩევნები, მიუხედავად კრიმინალური სპეცოპერაციისა, რომელსაც ხმების მიტაცება ჰქვია. მათ ["ქართულმა ოცნებამ"] მაინც ვერ მოიგეს თბილისი, დამარცხდნენ, ამიტომ საპროტესტო აქციები თბილისიდან უნდა დავიწყოთ და ყოველდღიურად უნდა შევუქმნათ დისკომფორტი ხელისუფლებას იმისათვის, რომ გავაგონოთ ქართველი ხალხის მრავალჯერ ნათქვამი არჩევანი, როგორიც არის ჩვენი ქვეყნის ევროპული მომავალი და ევროატლანტიკურ სივრცეში ინტეგრაცია",- განაცხადა ლანა გალდავამ.