ენერგეტიკის სექტორში ერთიანი ელექტრონული სისტემა შეიქმნება
ენერგეტიკის სფეროში სახელმწიფო სერვისებით სარგებლობის გაუმჯობესებისა და „ერთი ფანჯრის პრინციპით“ ინფორმაციის მიწოდების უზრუნველყოფისთვის ერთიანი ელექტრონული სისტემა შეიქმნება - აღნიშნულ პროექტზე სს „საქართველოს ენერგეტიკის განვითარების ფონდი” ეკონომიკისა და მდგრადი განვითარების სამინისტროსთან შეთანხმებით მუშაობს.
ეკონომიკისა და მდგრადი განვითარების სამინისტროს ინფორმაციით, ერთიანი ელექტრონული სისტემა გულისხმობს და მოიცავს ისეთ ფუნქციონალებს, როგორიცაა ინტერაქციული რუკა, ინფორმაციული ჰაბი, ინფორმაციაზე წვდომის ადმინისტრირება, ელექტრონული დოკუმენტბრუნვა, პროექტების მართვა და მონიტორინგი, მონაცემთა დამუშავება და დაარქივება, ინფორმაციული უსაფრთხოება, საკომუნიკაციო სივრცე და ა.შ.
საქართველოს ენერგეტიკის განვითარების ფონდის ხელმძღვანელის, ჯაბა ხმალაძის განცხადებით, ელექტრონული მმართველობა ენერგეტიკის დარგში ინფორმაციულ-საკომუნიკაციო ტექნოლოგიებზე დაფუძნებული კონცეფციაა, რომელიც მიზნად ისახავს სახელმწიფო მომსახურებებით სარგებლობის გაციფრულებასა და გამარტივებას.
„ეს უზრუნველყოფს საჯარო სტრუქტურების სერვისების წვდომას საერთო პლატფორმაზე, ერთიანი ელექტრონული სისტემისა და ბაზის შექმნის მეშვეობით. ენერგეტიკის მართვის ელექტრონული სისტემა მომხმარებელს საშუალებას მისცემს, ადგილმდებარეობის მიუხედავად, ისარგებლოს სხვადასხვა საჯარო უწყებების სერვისებით“ - აღნიშნა ჯაბა ხმალაძემ.
მისივე თქმით, ენერგეტიკის მართვის ელექტრონული სისტემის პლატფორმის მეშვეობით გაიზრდება უწყებებს შორის მონაცემთა გაცვლის სტანდარტები, ურთიერთთავსებადობა და ეფექტურობა, რაც ნიშნავს ნაკლები დროის დანახარჯს ადმინისტრაციული წარმოების პროცესში. ხმალაძის შეფასებით, პლატფორმა საშუალებას მისცემს როგორც ქართველ, ასევე უცხოელ ინვესტორს მარტივად, ერთ სივრცეში პირადი გვერდის მეშვეობით მიიღოს საჭირო ინფორმაცია და ელექტრონულად შეძლოს პროექტის იდენტიფიცირება, ინიცირება და ადმინისტრირება.
„მრავალფუნქციური სისტემა უზრუნველყოფს ენერგეტიკის სექტორში მიმდინარე პროცესების გამჭვირვალობასა და დარგში ეფექტურობის ზრდას - განაცხადა ჯაბა ხმალაძემ.
