საქართველო ძალიან მძიმე მდგომარეობაშია ახლა, ჩვენ აუცილებლად უნდა დავუდგეთ გვერდში ჩვენი ოპოზიციური პარტიის ლიდერებს. დღეს არ მივეკუთვნებით არც ერთ პარტიას, ჩვენ ვართ ყველანი ოპოზიციონერები. ისინი არიან მარტო და ჩვენ ვართ ერთად , - ასე მიმართა ოპერის ვარსკვლავმა პაატა ბურჭულაძემ აქციის მონაწილეებს, სადაც სიტყვით ევროპელი პარტნიორებიც გამოვიდნენ.

ბურჭულაძემ ევროკავშირის პარლამენტარებს “ქართული ოცნების” განცხადებების გამო ბოდიში საჯაროდ მოუხადა.

“ძვირფასო მეგობრებო, არც ერთი პოლიტიკური პარტიის წევრი არ ვარ, მე ვარ ერთ-ერთი მოქალაქე, რომელიც აქ დგას და ჩვენ ბოდიშს გიხდით იმის გამო, რა შეურაცხყოფაც მოგაყენათ ჩვენმა მთავრობამ. ფაქტობრივად, ყველაფერი მოგვპარეს და საქართველო იქ არ არის, საქართველო აქ დგას.

მე მინდა, გამოვიყენო ეს ტრიბუნა და ერთი რამ ვთქვა - არ უნდა ველოდოთ არავინ, რომ ჩვენ პერსონალურად ვინმე დაგვპატიჟებს აქ მოსასვლელად. როგორც კი გავიგებთ, რომ აქ შეხვედრა ჩაინიშნება, ყველა უნდა გამოვიდეთ აქ. საქართველო ძალიან მძიმე მდგომარეობაშია ახლა, ჩვენ აუცილებლად უნდა დავუდგეთ გვერდში ჩვენი ოპოზიციური პარტიის ლიდერებს. დღეს არ მივეკუთვნებით არც ერთ პარტიას, ჩვენ ვართ ყველანი ოპოზიციონერები, ამიტომ, ვიყოთ ერთად, ჩვენ ვერავინ მოგვერევა. პატივი ვცეთ ერთმანეთს, შეურაცხყოფა არ მივაყენოთ და როგორც კი გაჩნდება გამარჯვების მომენტი, მერე დავიწყოთ ერთმანეთის ჩახუტება. წინასწარ არ ვიზეიმოთ გამარჯვება, წინასწარ ვიზეიმოთ ერთი რამ - ისინი არიან მარტო და ჩვენ ვართ ერთად”, - განაცხადა პაატა ბურჭულაძემ.