ვლადიმერ პუტინს სატელეფონო ზარებით ვერავინ შეაჩერებს, მომდევნო კვირები გადამწყვეტი იქნება არა მხოლოდ ომისთვის, არამედ ჩვენი მომავლისთვისაც, - ამის შესახებ პოლონეთის პრემიერ-მინისტრი, დონალდ ტუსკი სოციალურ პლატფორმა X-ზე წერს.

მისი თქმით, წუხელ რუსეთის მიერ უკრაინის წინააღმდეგ განხორციელებულმა თავდასხმამ დაამტკიცა, რომ სატელეფონო დიპლომატია უკრაინის მიმართ რეალურ მხარდაჭერას ვერ შეცვლის.

„პუტინს სატელეფონო ზარებით ვერავინ შეაჩერებს. გუშინ ღამით განხორციელებულმა თავდასხმამ, რომელიც ერთ-ერთი ყველაზე დიდი თავდასხმა იყო ამ ომში, დაამტკიცა, რომ სატელეფონო დიპლომატია ვერ შეცვლის მთელი დასავლეთისგან უკრაინის მიმართ ნამდვილ მხარდაჭერას. მომდევნო კვირები გადამწყვეტი იქნება არა მხოლოდ ომისთვის, არამედ ჩვენი მომავლისთვისაც“, - წერს ტუსკი.

შეგახსენებთ, ოლაფ შოლცი ვლადიმერ პუტინს პარასკევს, ორი წლის განმავლობაში პირველად, ტელეფონით ესაუბრა. უკრაინის პრეზიდენტმა, ვოლოდიმირ ზელენსკიმ სატელეფონო საუბარი გააკრიტიკა დ განაცხადა, რომ ამ ზარმა ძირი გამოუთხარა პუტინის იზოლაციის მცდელობებს და "პანდორას ყუთი" გახსნა.