ბრძოლა გაგრძელდება ბოლომდე და იქნება აუცილებლად შედეგიანი , - ამის შესახებ „ძლიერი საქართველოს“ ერთ-ერთმა ლიდერმა, ირაკლი კუპრაძემ განაცხადა ჭავჭავაძის გამზირზე, სადაც „კოალიცია ცვლილებისა“ და „ერთიანობა - ნაციონალური მოძრაობის“ მოწოდებით, 24-საათიანი პროტესტია დაგეგმილი.

მისი თქმით, ყველას გააზრებული აქვს ქვეყანაში არსებული „მძიმე მდგომარეობა“.

„ეს ბრძოლა აუცილებლად დასრულდება გამარჯვებით, რადგან მოქალაქეებს, რომლებიც დგანან პარლამენტთან, თსუ-სთან, ბათუმში, (უნივერსიტეტში სტუდენტები იბრძვიან), ყველას ნათლად გვაქვს გააზრებული ქვეყანაში არსებული უმძიმესი მდგომარეობა, რომელიც ივანიშვილმა და რუსულმა რეჟიმმა შექმნა“, - განაცხადა კუპრაძემ.

მან ისაუბრა ოპოზიციის კოორდინაციის მნიშვნელობაზე და დასძინა, რომ ბრძოლა გაგრძელდება.

„ჩვენ ვდგავართ აქ, თსუ-სთან ჩვენს მეგობრებთან, კოლეგებთან ერთად. ბრძოლა გაგრძელდება ბოლომდე და იქნება აუცილებლად შედეგიანი. მნიშვნელოვანი ფაქტია, რომ ჩვენ ველოდებით ოპოზიციის მხრიდან მეტ კოორდინაციას, მეტ თანამშრომლობას და მეტ ინფორმირებას. კოალიცია ძლიერი საქართველო იქცევა სწორად, როცა არის ღია, როგორც მოქალაქეებთან ასევე, პარტნიორებთან საკუთარ გეგმებთან დაკავშირებით. მიუხედავად იმისა, რომ ეს მსვლელობა ვერ მოვიდა პარლამენტამდე ჩვენ მოვედით მსვლელობამდე, ვიდგებით ბოლომდე, რადგან მიზანი არის მნიშვნელოვანი“, - განაცხადა მან.

მისი თქმით, ახლა ევროპული მომავალი არის დასაცავი.

„ჩვენი საერთაშორისო პარტნიორები იცავენ საქართველოს ევროპულ მომავალს საკუთარი პოზიციებით, განცხადებებით, რომელიც უფრო მკაცრი გახდება...

მთავარი და მნიშვნელოვანია, რომ საქართველოს მოქალაქეებმა ვაჩვენოთ სხვადასხვა პროტესტის ფორმით, მაგრამ მტკიცედ წინააღმდეგობა, რომ არანაირი შანსი არ აქვს ბიძინა ივანიშვილს შერჩეს გაყალბებული არჩევნები“, - განაცხადა მან.