ოკუპირებული აფხაზეთის ყველა ე.წ. სამინისტროს, მათ შორის ძალოვანი სტრუქტურების, ხელმძღვანელები თავიანთ „თანამდებობებზე“ რჩებიან. შესაბამისი განცხადება ე.წ. დეპუტატმა კან კვარჩიამ გააკეთა.

მისი თქმით, აფხაზეთის ე.წ. პრეზიდენტი ასლან ბჟანია თანამდებობას ტოვებს, მის მოვალეობას „ვიცე-პრეზიდენტი“ ბადრა გუნბა შეასრულებს. თანამდებობას ასევე ტოვებს ე.წ. პრემიერ-მინისტრი, ალექსანდრე ანქვაბი და მის მოვალეობას ყოფილი „პრემიერ-მინისტრი“ ვალერი ბგანბა შეასრულებს.

ამასთან, საპროტესტო აქციის მონაწილეებმა აფხაზეთის ე.წ. სამთავრობო შენობები 19 ნოემბერს უნდა დატოვონ, წინააღმდეგ შემთხვევაში ბჟანია „გადადგომაზე“ უარს განაცხადებს.

შეგახსენებთ, ოკუპირებული აფხაზეთის ე.წ. ხელისუფლებასა და ოპოზიციას შორის დაპირისპირება რუსეთთან საინვესტიციო შეთანხმების გამო დაიწყო, რომელიც ოკუპირებულ აფხაზეთში ბინების მშენებლობას ითვალისწინებს. ე.წ. პარლამენტს „დოკუმენტის“ რატიფიცირება 15 ნოემბერს უნდა მოეხდინა, თუმცა პროტესტის დაწყების გამო საკითხის განხილვა გადადო. ოპოზიციის მხარდამჭერებმა სოხუმში ე.წ. სამთავრობო შენობები დაიკავეს, მათ შორის ე.წ. პრეზიდენტის ადმინისტრაცია და ასლან ბჟანიას გადადგომა მოითხოვეს.