სამოქალაქო საზოგადოების ჯილდო საქართველომ ისტორიაში პირველად მიიღო. მას, ჟურნალისტიკის რესურსცენტრს, აღმოსავლეთ პარტნიორობის 1200 სამოქალაქო საზოგადოების ორგანიზაცია გადასცემს.

დაჯილდოება ავსტრიაში, ვენაში გაიმართა.

ინფორმაციის თანახმად, ჟურნალისტიკის რესურსცენტრმა და მისმა ხელმძღვანელმა, ნათია კუპრაშვილმა ჯილდო ე.წ “რუსული კანონის” წინააღმდეგ ბრძოლისათვის, საქართველოში თავისუფალი, სამართლიანი და დამოუკიდებელი მედიისთვის დაცვისთვის მიიღო.

„პროპაგანდას მხოლოდ ძლიერი ადგილობრივი ჟურნალისტიკის საშუალებით შეგვიძლია შევეწინააღმდეგოთ. გასული თვის არჩევნებმა საქართველოში მკაფიოდ აჩვენა, ავტორიტარიზმისაგან დასაცავად პრესის თავისუფლების აუცილებლობა. ეს განსაკუთრებით ეხება ისეთ ქვეყნებს, როგორიც საქართველოა, სადაც მედიას აკონტროლებენ რუსული პროპაგანდით გამსჭვალული ოლიგარქები. ჟურნალისტებს და სამოქალაქო საზოგადოების ორგანიზაციებს, რომლებიც ერთად მუშაობენ, შეუძლიათ ცვლილებების მოტანა ფაქტებზე დაფუძნებული ინფორმაციის მიწოდებასა და დემოკრატიის მხარდასაჭერად“, – აღნიშნა ნათია კუპრაშვილმა.

“სამოქალაქო საზოგადოების ჯილდო” (Civil Society Award) 2018 წელს, 1 200-ზე მეტი აღმოსავლეთ პარტნიორობის საზოგადოების ორგანიზაციამ დააარსა და მისი მიზანი სამოქალაქო ორგანიზაციების მხარდაჭერაა, რომლებიც ემსახურებიან ქვეყანაში დემოკრატიული რეფორმების გატარებას, მათი ქვეყნების პოლიტიკური, ეკონომიკური და სოციალური განვითარების ხელშეწყობას და მოსახლეობის მხარდაჭერას.

ამასთან, ჯილდოს დაწესების მოტივაცია იყო ხაზგასმა, რომ სამოქალაქო სექტორი აღმოსავლეთ პარტნიორობის ქვეყნებში რეფორმების მთავარი მამოძრავებელია და მათი წარმომადგენლები დემოკრატიული ღირებულებების ხმამაღალი დამცველები არიან.

სამოქალაქო საზოგადოების ჯილდოს მფლობელები სხვადასხვა დროს იყვნენ:

• 2018 – დავით პეტროსიანი (სომხეთი)
• 2019 – Promo-LEX (მოლდოვა)
• 2020 – ბელორუსის სამოქალაქო საზოგადოება (ბელორუსი)
• 2022 – უკრაინის სამოქალაქო საზოგადოება (უკრაინა)
• 2023 – ბელორუსის ჟურნალისტთა ასოციაცია (ბელორუსი)
• 2024 – ჟურნალისტიკის რესურსების ცენტრი (საქართველო)

ჟურნალისტიკის რესურსცენტრი 2009 წელს, ჟურნალისტმა ნათია კუპრაშვილმა რამდენიმე დამოუკიდებელ ჟურნალისტთან ერთად დააფუძნა. ორგანიზაციის ძირითადი მიმართულება დეზინფორმაციასთან ბრძოლა, დამოუკიდებელი მედიის მხარდაჭერა და რეგიონული მედიის გაძლიერებაა.

JRC ასევე დამფუძნებელია ერთადერთი რუსულენოვანი სატელევიზიო მაუწყებლის TOK TV, რომელიც რუსული დეზინფორმაციის საპირწონედ შეიქმნა. ჟურნალისტიკის რესურსცენტრი ასევე გახლავთ ინოვაციური ხელსაწყოს, მობილური აპლიკაციის Fact or Fake ავტორი“, - ნათქვამია ინფორმაციაში.