მარნეულის მუნიციპალიტეტის სოფელ მეორე ქესალოს მახლობლად არქეოლოგიური გათხრები ინტენსიურად მიმდინარეობს. ამის შესახებ ინფორმაციას მარნეულის მერია ავრცელებს.

მათივე ცნობით, ადგილზე არქეოლოგიური სამუშაოები 2020 წელს დაიწყო.

„კვლევის პროცესში აღმოჩენილია V-VI საუკუნეებით დათარიღებული დიდგვაროვნული სასახლე, სამარხი, ადამიანის ნეშტი და მრავალი მნიშვნელოვანი არტეფაქტი.

აღმოჩენილ არტეფაქტებს ადგილზე გაეცნენ მარნეულის მუნიციპალიტეტის მერი კენან ომაროვი, საკრებულოს თავმჯდომარე ამირან გიორგაძე და მერის პირველი მოადგილე როინ დეკანოიძე.

სამუშაოები ხორციელდება შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით, საქართველოს ეროვნული მუზეუმის ექსპედიციის ფარგლებში, დავით მინდორაშვილის ხელმძღვანელობით.

აღნიშნული აღმოჩენა კიდევ ერთხელ ხაზს უსვამს მარნეულის მუნიციპალიტეტის უნიკალურ კულტურულ-ისტორიულ მნიშვნელობას“, - ნათქვამია ინფორმაციაში.