გაერთიანებული სამეფოს მთავრობამ უკრაინას კიდევ ათობით Storm Shadow-ს ფრთოსანი რაკეტა გაუგზავნა, - ინფორმაციას Bloomberg-ი ავრცელებს.

გამოცემის ცნობით, მიწოდება, რომელიც საჯაროდ არ გამოცხადებულა, რამდენიმე კვირის წინ განხორციელდა. Bloomberg-ის წყაროებმა რაკეტების უკრაინაში ჩასვლის ზუსტი დრო და მათი რაოდენობა არ დააკონკრეტეს, თუმცა განაცხადეს, რომ რაკეტები იქამდე გაიგზავნა, სანამ შეერთებულმა შტატებმა და გაერთიანებულმა სამეფომ რუსეთის ტერიტორიაზე მდებარე სამიზნეებზე დარტყმის ნებართვის გაცემის გადაწყვეტილება მიიღეს.

Bloomberg-ი წერს, რომ ეს იყო უკრაინისთვის Storm Shadow-ს რაკეტების პირველი მიწოდება მას შემდეგ, რაც პრემიერ-მინისტრი კირ სტარმერი გახდა, რომელიც უკრაინას რუსეთის წინააღმდეგ ომში შემდგომ მხარდაჭერას დაჰპირდა.