იუსტიციის მინისტრობის კანდიდატი ანრი ოხანაშვილი პარლამენტში მთავრობისთვის ნდობის გამოცხადების ფორმატში მოხსენებით წარდგა. სიტყვით გამოსვლისას ოხანაშვილმა ყურადღება გაამახვილა პენიტენციური სისტემისა და პრობაციის სამსახურის განვითარებაზე.

ანრი ოხანაშვილის განცხადებით, სამინისტრო განაგრძობს პენიტენციურ სისტემაში დანერგილი უმაღლესი სტანდარტების დაცვას.

„სამინისტრო განაგრძობს პენიტენციურ სისტემაში დანერგილი უმაღლესი სტანდარტების დაცვას და იზრუნებს ამ სტანდარტების შემდგომ გაუმჯობესებაზე, ასევე, პრობაციის სამსახურის განვითარების კუთხით გადაიდგმება კონკრეტული ნაბიჯები. საუბარია შემდეგ საკითხებზე: გაგრძელდება ინფრასტრუქტურული პროექტები პენიტენციურ დაწესებულებებში; ყურადღება გამახვილდება მსჯავრდებულთა და პრობაციონერთა სარეაბილიტაციო პროგრამებზე, ასევე, საჭიროების მიხედვით, შემუშავდება ახალი პროგრამები და გაიზრდება პროგრამებში მსჯავრდებულთა ჩართულობა.

ასევე, ერთ-ერთი მნიშვნელოვანი საკითხია არასრულწლოვანთა დანაშაულის პრევენციის მიზნით შესაბამისი ღონისძიებების გატარება, რა თქმა უნდა, აქ ჩვენს კოლეგა მეგობარ უწყებებთან ერთად მოგვიწევს კოორდინირებული მუშაობა, უპირველეს ყოვლისა, შინაგან საქმეთა სამინისტროსთან ერთად. აქაც გავაგრძელებთ მუშაობას არასრულწლოვანთა რეფერირების ცენტრის განვითარებასთან დაკავშირებით. ჩვენი ამოცანაა პრევენციაზე ორიენტირებული საქმიანობის განხორციელება და იქ, სადაც კანონთან კონფლიქტში მყოფი არასრულწლოვნები სჩადიან კონკრეტულ გადაცდომებს, ამასთან დაკავშირებით საჭიროა შესაბამისი ჰუმანური საერთაშორისო სტანდარტების მექანიზმების არსებობა და ამ მიმართულებით ჩვენ ვიმუშავებთ, ასევე, აღდგენითი მართლმსაჯულების კუთხით, ისევე, როგორც განრიდებისა და მედიაციის პროგრამების დახვეწასა და შემდგომ განვითარებაზე“, ‒ განაცხადა იუსტიციის მინისტრობის კანდიდატმა.