“გაზპრომმა” თითქმის ყველა ევროპელი კლიენტი დაკარგა და უკრაინის გავლით ტრანზიტის შეწყვეტისთვის უკვე მოემზადა. ამის შესახებ ინფორმაციას გამოცემა Reuters -ი “გაზპრომში” გარკვეულ წყაროზე დაყრდნობით წერს.

წყაროს თანახმად, რუსული გაზის მონოპოლისტ “გაზპრომის” გეგმები იმ მოცემულობიდან გამომდინარეობს, რომ 2024 წლის 31 დეკემბრის შემდეგ უკრაინის გავლით ევროპაში გაზის ტრანზიტი აღარ განხორციელდება.

მიუხედავად იმისა, რომ კიევმა არაერთხელ განაცხადა, რომ მას არ სურს შეთანხმების გახანგრძლივება, რომელსაც უკრაინისთვის სატრანზიტო მოსაკრებლების სახით წელიწადში 1 მილიარდ დოლარამდე მოაქვს, მოსკოვი სიგნალებს იძლევა, რომ მზად არის მოლაპარაკებებისთვის და უკრაინის ტერიტორიის გავლით გაზის ტრანზიტის გაგრძელების შესაძლებლობისთვის.

თუმცა აღნიშნულია, რომ რუსეთმა, რომელიც უკრაინაში ფართომასშტაბიან შეჭრამდე ევროპაში ბუნებრივი აირის უდიდესი იმპორტიორი იყო, ამ მომენტისთვის თითქმის ყველა ევროპელი კლიენტი დაკარგა. ეს რუსულ ენერგეტიკაზე დამოკიდებულების შემცირების ევროკავშირის ძალისხმევებსა და 2022 წელს “ჩრდილოეთის ნაკადის” გაზსადენის აფეთქებას მოჰყვა.

გამოცემის წყაროს თანახმად, მომავალი წლისთვის რუსეთის საბაზისო სცენარი უკრაინის გავლით გაზის ტრანზიტის სრულ არარსებობას ითვალისწინებს.