კულტურის მინისტრობის კანდიდატი - გელათში ვიყავი ჩასული, ვესაუბრე კომიტეტს, თუ საერთაშორისო დონეზე პროტოკოლი კარგად გაიწერება, რა მიმართულებით უნდა შევეხოთ ძეგლებს, ეს იქნება სწორი მიდგომა

გელათში ვიყავი ჩასული, ვესაუბრე კომიტეტს. თუ საერთაშორისო დონეზე პროტოკოლი კარგად გაიწერება, რა მიმართულებით უნდა შევეხოთ ძეგლებს, ეს იქნება სწორი მიდგომა, - ამის შესახებ კულტურისა და სპორტის მინისტრობის კანდიდატმა, თინათინ რუხაძემ, პარლამენტში, კომიტეტების გაერთიანებულ სხდომაზე გამოსვლისას აღნიშნა.

მისივე თქმით, მეთოდებსა და მიდგომებზე, ყველა მიმართულებით, სამუშაოა.

„გელათში ვიყავი ჩასული, ვესაუბრე კომიტეტს. ყველამ იცით, რომ ამ წუთას სამინისტრო არ მართავს იქ პროცესს, მაგრამ უკვე გვაქვს თანამშრომლობითი, ძალიან კარგი ურთიერთობა. თუ საერთაშორისო დონეზე პროტოკოლი კარგად გაიწერება, რა მიმართულებით უნდა შევეხოთ ძეგლებს, ეს იქნება სწორი მიდგომა. აქაც რესტავრატორების ნაკლებობაა, აქაც ხელოვნების ისტორიკოსების მდგომები იყოფა და მერე ყველა ვიჩემებთ, რომ არა ჩემი აზრია კარგი, არა სხვისი. პროტოკოლი უნდა იყოს დაწერილი და საერთაშორისო დონეზე მეთოდური მიდგომები თუ გაიწერება, ეს იქნება ძეგლთა დაცვის სააგენტოს სწორი მიდგომა. სახელმწიფო ბიუჯეტით აქვს ნახევარი, ნახევარი აქვს საკუთარი შემოსავლები, ჯამურად დაახლოებით 32 მილიონიანი ბიუჯეტი აქვს მარტო ძეგლთა დაცვას. ამ ეტაპზეც აკეთებენ ბევრ საქმეს, მაგრამ მგონია, რომ აქაც მიდგომა უნდა შევცვალოთ ძეგლების მიმართ. იმიტომ, რომ ყველა ძეგლის ძეგლთა დაცვის სპეციალისტი გეუბნება, რომ „ნუ მოკიდებ ძეგლს ხელს, თუ არ იცი, რა მეთოდიკით უნდა ჩაატარო ან კონსერვაცია, ან იკვლიო, ან რეაბილიტაცია ჩაატაროო“. იმიტომ, რომ სწორედ ასეთ დროს შეიძლება ის დაზიანდეს. მგონია, რომ მეთოდებსა და მიდგომებზე, ყველა მიმართულებით სამუშაო გვექნება“,- განაცხადა თინათინ რუხაძემ.