ნატო-დან და ევროკავშირიდან გასვლა არ მინდა, - ამის შესახებ რუმინეთის პრეზიდენტობის ულტრამემარჯვენე კანდიდატმა, კალინ ჯორჯესკუმ განაცხადა.

„ეს ასე არ არის! ეს არასდროს მითქვამს. მაგრამ, მე ვამბობდი, რომ მოლაპარაკებების წარმოება და ეროვნული ინტერესების პირველ ადგილზე დაყენება მსურს. ნატო-დან და ევროკავშირიდან გასვლა არ მინდა. რაც მსურს არის ის, რომ გარკვეული პოზიცია დავიკავო და მუხლებზე არ დავდგე. როგორც ვთქვი, ყველაფერი ჩვენი ეროვნული ინტერესებიდან გამომდინარე უნდა გავაკეთოთ“, - განაცხადა კალინ ჯორჯესკუმ.

მისივე თქმით, საპრეზიდენტო არჩევნების მეორე ტურში მის მოწინააღმდეგეს, ელენა ლასკონის რუმინეთის უკრაინაში მიმდინარე ომში ჩართვა სურს.

„გუშინ ვნახეთ, როგორ გამოუცხადა ქალბატონმა ლასკონიმ ომი არა მხოლოდ მე, არამედ, მთელ ქვეყანას. გერმანიამ განაცხადა, რომ ომისთვის ემზადება, ლასკონიმაც იგივე გაიმეორა და დაამატა, რომ ნატო-სა და ევროკავშირის ნებისმიერ მოთხოვნას შეასრულებს“, - აღნიშნა კალინ ჯორჯესკუმ.

შეგახსენებთ, რუმინეთის საპრეზიდენტო არჩევნების პირველ ტურში კალინ ჯორჯესკუმ გაიმარჯვა. საპრეზიდენტო არჩევნების მეორე ტურში, რომელიც 8 დეკემბერს გაიმართება, ის მემარჯვენე-ცენტრისტული ოპოზიციური პარტიის „კავშირი რუმინეთის ხსნისთვის“ ლიდერს, ელენა ლასკონის დაუპირისპირდება.