„ქართული ოცნების“ ოფისთან შეკრებილი აქციის მონაწილეები რუსთაველის გამზირზე, პარლამენტის წინ მიმდინარე აქციას მსვლელობით შეუერთდნენ.

დემონსტრანტები მათ მისვლას ტაშითა და შეძახილებით შეხვდნენ. პარალელურად, აქციის მონაწილეების ნაწილი პარლამენტის გარშემო არსებულ რკინის ჯებირებზე აბრახუნებენ და საკუთარ პროტესტს ასე გამოხატავენ.

აქციები თბილისში და რამდენიმე ქალაქში მას შემდეგ დაიგეგმა, რაც საქართველოს პრემიერ-მინისტრმა, ირაკლი კობახიძემ საპარლამენტო უმრავლესობისა და სამთავრობო გუნდის შეხვედრის შემდეგ ბრიფინგზე განაცხადა, რომ საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს.

პრემიერ-მინისტრის განცხადებით, საქართველო, ასევე, 2028 წლის ბოლომდე უარს ამბობს ყოველგვარ საბიუჯეტო გრანტზე ევროკავშირის მხრიდან.