რუსთაველის გამზირი სამართალდამცველებმა აქციის მონაწილეებისგან გაათავისუფლეს. თავის მხრივ, პარლამენტის მიმდებარე ტერიტორია დატოვა სპეცრაზმმა და წყლის ჭავლის მანქანებმა.

ამ დროისთვის რუსთაველის თეატრის წინ საპოლიციო ძალების წარმომადგენლებს კორდონი აქვთ გაკეთებული და მოქალაქეებს გადაადგილების საშუალებას არ აძლევენ.

პარალელურად, „თბილსერვისის“ ჯგუფის თანამშრომლები პარლამენტის მიმდებარე ტერიტორიას ასუფთავებენ.

შეგახსენებთ, თბილისში 28 ნოემბერს, საპროტესტო გამოსვლები მას შემდეგ დაიწყო, რაც პრემიერ-მინისტრმა, ირაკლი კობახიძემ მმართველი გუნდის გადაწყვეტილება გამოაცხადა, რომ საქართველომ 2028 წლის ბოლომდე დღის წესრიგში არ დააყენებს ევროკავშირთან მოლაპარაკებების გახსნის საკითხს. აქციის მონაწილეები თბილისში ორი ლოკაციაზე - გორგასლის ქუჩაზე, "ქართული ოცნების" ოფისთან და რუსთაველის გამზირზე, პარლამენტის შენობასთან შეიკრიბნენ. მოგვიანებით აქცია გაერთიანდა პარლამენტის წინ, სადაც ვითარება სამართალდამცველებსა და აქციის მონაწილეებს შორის არაერთხელ დაიძაბა. დაახლოებით, ღამის 2:00 საათის, შემდეგ საპოლიციო ძალებმა დემონსტრანტების გაფრთხილების შემდეგ, რუსთაველის გამზირზე მიმდინარე აქციის დაშლა დაიწყეს. სპეცრაზმმა მომიტინგეების წინააღმდეგ წყლის ჭავლი არაერთხელ გამოიყენა.

ჯერჯერობით უცნობია, რამდენი ადამიანი დააკავეს და რამდენი დაშავდა საპროტესტო აქციაზე.