რომელიღაც სამინისტროს თანამშრომელი, რომ განცხადებას დებს და აწერს ხელს სიცრუეზე დაყრდნობით, ეს თქვენი ბრალიაო გვეუბნებიან. რადიკალური პარტიული ინტერესიდან ვიღებ ამ ყველაფერს, მაგრამ დემოკრატიული ინტერესიდან გამომდინარე შეიძლება არ იყოს მთლად სამართლიანი, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს განუცხადა.

მისივე თქმით, ადამიანებს, რომლებიც აქციაზე დარბიან, მაგრამ თავისი საქმე იციან კარგად „ნაცებისგან“ განსხვავებით, დღევანდელი ხელისუფლება არ უშვებს სამსახურიდან, მაგრამ ახლა, როცა ეს ადამიანები გადიან ყოველგვარ ზღვარს და სიცრუეს ტირაჟირებენ თავისი ძალიან ცუდი, ანტისახელმწიფოებრივი მოქმედებებით ამაზე უნდა იზრუნოს ყველა უწყებამ.

„ადამიანი აქციაზე რომ დარბის, მაგრამ თავისი საქმე იცის კარგად, „ნაცები“ უშვებდნენ კი არა იჭერდნენ და ჩვენ არ გავუშვით, პარტიულად შეიძლება მართლები არ ვიყავით, მაგრამ სახელმწიფოებრივად მართლები ვიყავით, მაგრამ ახლა, როცა ეს ადამიანები გადიან ყოველგვარ ზღვარს და სიცრუეს ტირაჟირებენ თავისი ძალიან ცუდი, ანტისახელმწიფოებრივი მოქმედებებით ამაზე უნდა იზრუნოს ყველა უწყებამ, რომ შენ კი ბატონო დემოკრატიული ხელმძღვანელი ხარ, მინისტრი ხარ, მოადგილე ხარ, რომელიღაცა რგოლის ხელმძღვანელი ხარ და იმის გამო, რომ საწინააღმდეგო აზრის არის და დარბის რაღაც აქციაზე არ უშვებ სამსახურიდან, მაგრამ როდესაც ის თავისი ქმედებით ანტისახელმწიფოებრივ სიცრუეს ტირაჟირებს, რომელიც ანგრევს სახელმწიფოს და მის საწყისებს, აქ არ ვიცი რა გადაწყვეტილება უნდა იყოს. ეს სამსჯელო თემაა ძალიან სერიოზული“, - განაცხადა მამუკა მდინარაძემ.