თითქმის ორი საათია უცვლელია ვითარება რუსთაველის გამზირზე. ადგილზე კვლავ რჩებიან მომიტინგეები, ასევე, ტერიტორიაზე განლაგებულია სპეციალური დანიშნულების რაზმი. ადგილზე რჩება წყლის ჭავლის ავტომობილები.

სპეცრაზმსა და აქციის მონაწილეებს გარკვეული მონაკვეთის დაშორებით ჰყოფს ბარიკადები, რომელიც სკამების, ნაგვის ურნებისა და სხვადასხვა ნივთისა და კონსტრუქტიის გამოყენებით დემონსტრანტებმა ააგეს.

ადგილზე იმყოფებიან ოპოზიციური პოლიტიკური პარტიების წარმომადგენლებიც.

შეგახსენებთ, 29 ნოემბერს, საპროტესტო აქცია რუსთაველის გამზირზე, პარლამენტის წინ 19:00 საათზე დაიწყო. ადგილზე ვითარება არაერთხელ დაიძაბა პროტესტის მონაწილეებსა და სამართალდამცველებს შორის. მომიტინგეების დაშლა სპეცრაზმმა დაახლოებით, ღამის, 12:00 საათისთვის დაიწყო. დემონსტრანტების წინააღმდეგ არაერთხელ გამოიყენეს წყლის ჭავლი და სპეციალური საშუალებები. თავის მხრივ დემონსტრანტები საპოლიციო ძალების მისამართით პიროტექნიკას და სხვადასხვა საგნებს ისროდნენ, მომიტინგეები ცდილობდნენ სხვადასხვა კონსტრუქციით ბარიკადების აღმართვასაც, რათა სპეცრაზმისთვის გზა ჩაეხერგათ. სამართალდამცველები აქციის მიმდინარეობისას პერიოდულად აკავებდნენ მომიტინგეებს, არიან დაშავებულებიც, თუმცა მათი რაოდენობა ჯერჯერობით უცნობია.

შეგახსენებთ, ბოლო ორი დღის განმავლობაში მოქალაქეების პროტესტი მოჰყვა მთავრობის გადაწყვეტილებას - საქართველომ 2028 წლის ბოლომდე დღის წესრიგში არ დააყენოს ევროკავშირთან მოლაპარაკებების გახსნის საკითხი.