საქართველოს ახალგაზრდა იურისტთა ასოციაცია 33-ე საერთო კრების რეზოლუციას ასაჯაროებს და შსს მხრიდან დემონსტრანტების მიმართ გადადგმულ ნაბიჯებს სისასტიკედ აფასებს და დაკავებული პირების გათავისუფლებას მოითხოვენ.

მათი თქმით, სამართალდამცავი ორგანოები, რომლებიც სამართლის უზენაესობის დაცვას უნდა ემსახურებოდნენ, სცემენ, სასტიკად უსწორდებიან და დევნიან მოქალაქეებს.

„ჩვენ, საქართველოს ახალგაზრდა იურისტთა ასოციაციის წევრები, კატეგორიულად ვგმობთ იმ სისასტიკეს, რომელსაც არალეგიტიმური ხელისუფლება მშვიდობიანი დემონსტრანტების წინააღმდეგ ახორციელებს.

საქართველოს კონსტიტუციის 78-ე მუხლის თანახმად, ქართველი ხალხის ურყევი ნებაა, რომ საქართველო გახდეს არა მხოლოდ დემოკრატიული სახელმწიფო, არამედ ევროკავშირის სრულუფლებიანი წევრი. ეს არჩევანი ასახავს ჩვენი საზოგადოების ღირებულებებსა და მისწრაფებებს და მას ვერანაირი ძალადობრივი ქმედება ვერ ჩაახშობს. მიტაცებული სახელმწიფო ინსტიტუტების ფონზე არალეგიტიმურად დამტკიცებულმა მთავრობამ არ უნდა მიიღოს გადაწყვეტილებები, რომლებიც ეწინააღმდეგება ქვეყნის კონსტიტუციას და მოქალაქეების ნებას.

სამართალდამცავი ორგანოები, რომლებიც სამართლის უზენაესობის დაცვას უნდა ემსახურებოდნენ, სცემენ, სასტიკად უსწორდებიან და დევნიან მოქალაქეებს. ეს ქმედებები სცილდება სამართლებრივ ჩარჩოებს და წარმოადგენს ადამიანის უფლებების უხეშ დარღვევას.

მოვითხოვთ:

დაუყოვნებლივ შეწყდეს ძალადობა, მოქალაქეთა და მედიის წარმომადგენელთა მიზანმიმართული ცემა და დევნა;

გათავისუფლდეს ყველა უკანონოდ დაკავებული პირი;

ჩატარდეს აქციის მონაწილეებისა და ჟურნალისტების მიმართ ჩადენილი დანაშაულის ეფექტიანი გამოძიება“,- ნათქვამია ინფორმაციაში.