განათლების, მეცნიერებისა და ახალგაზრდობის მინისტრი ალექსანდრე წულაძე ეთანხმება პრემიერის განცხადებას, რომ მას, ვინც ევროინტეგრაციის შეჩერებაზე „ქართული ოცნების“ განცხადებას ემიჯნება, წაკითხული გააზრების პრობლემა აქვს.

როგორც წულაძემ მთავრობის ადმინისტრაციაში გამართულ პრესკონფერენციაზე განაცხადა, საზოგადოების ნაწილს, მმართველი პარტიის მიერ გაკეთებული განცხადებების წაკითხულის შინაარსის გააზრება, ნებით ან უნებლიედ, უჭირს.

„ვეთანხმები [პრემიერი განცხადებას]. ჩემი აზრიც არის, რომ ოპოზიციურად განწყობილი საზოგადოების ნაწილს, მმართველი პარტიის მიერ გაკეთებული განცხადებების წაკითხულის შინაარსის გააზრება ან შეგნებულად, ან შეუგნებლად უჭირთ. მათი მხრიდან, ინფორმაცია, რომელსაც მმართველი ძალა ავრცელებს, ხშირად სწორად არაა აღქმული და ეს შეგნებულად ხდება, ნებით თუ უნებლიედ, ზუსტად არ ვიცი“,- განაცხადა წულაძემ.

ცნობისთვის, დღეს პრემიერ-მინისტრმა ირაკლი კობახიძემ ევროინტეგრაციის პროცესის შეჩერებაზე „ქართული ოცნების“ გადაწყვეტილებასთან დაკავშირებით განაცხადა, რომ დიდი პრობლემაა, როცა საჯარო მოსამსახურეებს ან პედაგოგებს წაკითხულის გააზრება უჭირთ.

„ამ პროცესში რაც არის კარგი ისაა, რომ სისტემა იწმინდება. ასევე, აშკარად გამოიკვეთა, რომ საქართველოში არის წაკითხულის გააზრების სერიოზული პრობლემა. როდესაც რიგითი ადამიანი ვერ იაზრებს წაკითხულს ან მოსმენილს, ეს შეიძლება ნაკლები პრობლემა იყოს, მაგრამ, როდესაც წაკითხულის გააზრება უჭირთ საჯარო მოსამსახურეებს ან პედაგოგებს, კიდევ უფრო დიდი პრობლემაა“,- განაცხადა კობახიძემ.