ციფრული მარკეტინგის სპეციალისტისა და აქტივისტის, დოდი ხარხელის სახლში პოლიციაა მობილიზებული.

ამ დროისთვის, არაა დაზუსტებული, რა სახის საპოლიციო მოქმედებები მიმდინარეობს მის სახლში.

როგორც ადგილზე მობილიზებული მოქალაქეები აღნიშნავენ, სამართალდამცავებმა დოდი ხარხელი სახლში ცოტა ხნის წინ შეიყვანეს.

ადგილზე, მოქალაქეები ხარხელის სახლთან მიმდინარე პროცესებს აპროტესტებენ.

„სამარცხვინოები ხართ, მონები ხართ“, - მიმართავენ მოქალაქეები პოლიციას.

დოდის მეგობრის ინფორმაციით, აქტივისტი პოლიციამ საბავშვო ბაღთან აიყვანა, სადაც ხარხელმა არასრულწლოვანი ბავშვი დატოვა.

„დოდის პატარა ბავშვი ჰყავდა დასატოვებლად წაყვანილი საბავშვო ბაღში. იქ აიყვანეს. ცოტა ხნის წინ კი, სახლში მოიყვანეს და ზემოთ აიყვანეს. იქ რა ხდება არ ვიცით. სავარაუდოდ, ჩხრეკა უნდა ჩაატარონ. ამდენი საათის განმავლობაში, ამ ცხოველების პირისპირ არასრულწლოვანი ბავშვი სახლში მარტო იყო, ამ ყველაფერს უყურებდა. არანაირი პროცედურა არ დაუცვიათ. ბავშვის ბიძა იყო მოსული, ითხოვდა შიგნით შემიშვითო. ამდენი ხნის შემდეგ, ეს ბავშვი ძლივს გამოვიყვანეთ“,- განაცხადა დოდის მეგობარმა, ნინა ჟორჟოლაძემ.

სახლთან საპოლიციო ძალების მობილიზების შესახებ თავდაპირველად, დოდი ხარხელის მეუღლემ სოციალურ ქსელში გაავრცელა.