ასე მოგვადგებიან ყველას სახლში სათითაოდ, ყველას ასე დაგვიჭერენ, ყველასთან მოაკაკუნებენ, ყველას წაგვიყვანენ - ეს არის მოძალადე სისტემა, - ამის შესახებ ჟურნალისტმა ნინია კაკაბაძემ აქტივისტის, დოდი ხარხელის სახლთან განაცხადა.

მისივე თქმით, მათ არ აქვთ ინფორმაცია, რა მიზნით იმყოფება პოლიცია დოდის ხარხელის სახლში.

როგორც ნინია კაკაბაძემ აღნიშნა, სახლში დოდი ხარხელთან და მის მეუღლესთან ერთად, ადვოკატიც იმყოფება.

„არანაირი ინფორმაცია არ მაქვს. ერთ-ერთ ჯგუფში, სადაც ყველანი ერთად ვართ, დაწერეს, რომ დოდისთან იყვნენ მოსულები და რომ მის დაპატიმრებას აპირებენ. არაფერს არ გვეუბნებიან, საერთოდ რას უკავშირდება მის სახლში ჩხრეკა, მისი დაპატიმრება და აქ, ადგილზე მოყვანა. ვნახოთ, ველოდებით. ყველას მოვუწოდებ, რომ ვისაც საშუალება აქვს, მოვიდეს აქ. ასე მოგვადგებიან ყველას სახლში სათითაოდ. საბოლოოდ, ყველას აი ასე დაგვიჭერენ. ყველასთან მოაკაკუნებენ. ყველას წაგვიყვანენ. ეს არის მოძალადე სისტემა. ასე იქცევა ის.

სხვა რა უნდა ვიფიქრო, [მის აქტივისტობას უკავშირდება]. კრიმინალი დოდი არ არის. ქოლცენტრი გაქვსო ვერ ეტყვიან“, - განაცხადა ნინია კაკაბაძემ.

ცნობისთვის, ციფრული მარკეტინგის სპეციალისტისა და აქტივისტის, დოდი ხარხელის სახლში პოლიციაა მობილიზებული.

ამ დროისთვის, არაა დაზუსტებული, რა სახის საპოლიციო მოქმედებები მიმდინარეობს მის სახლში.

როგორც ადგილზე მობილიზებული მოქალაქეები აღნიშნავენ, სამართალდამცავებმა დოდი ხარხელი სახლში ცოტა ხნის წინ შეიყვანეს.

ადგილზე, მოქალაქეები ხარხელის სახლთან მიმდინარე პროცესებს აპროტესტებენ.