გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარე, მიხაილ როთი საქართველოში ოპოზიციის წარმომადგენლების დაკავებას მმართველი პარტიის მიერ ლიბერალური დემოკრატიის ნგრევად აფასებს.

„მას შემდეგ, რაც მომიტინგეები სასტიკად სცემეს და დააკავეს, ახლა ოპოზიციონერ პოლიტიკოსებს აპატიმრებენ. ეს არის ლიბერალური დემოკრატიის ნგრევა მმართველი პარტიის მიერ!“- წერს როთი X-ის საკუთარ გვერდზე.

ცნობისთვის, დღეს აქტივისტების ბინებსა და პოლიტიკური პარტიების ოფისებში პოლიციამ ჩხრეკა ჩაატარა. უფრო კონკრეტულად, საგამოძიებო მოქმედებები ჩატარდა „ერთიანობა ნაციონალური მოძრაობის“, „კოალიცია ცვლილებისთვის“ და „დროას“ ოფისებში. ასევე გაჩხრიკეს „დაიტოვეს“ ერთ-ერთი დამფუძნებლის ილია ღლონტის ბინა. გარდა ამისა, „დროას“ ოფისთან, ჩხრეკის პარალელურად, დააკავეს „კოალიცია ცვლილებისთვის“ ლიდერი ნიკა გვარამია და კოალიციის წევრი გელა ხასაია. დაკავებულია მოძრაობა „დაფიონის“ წევრი, ზვიად ცეცხლაძეც.