13 დეკემბერს, XI მოწვევის პარლამენტი საშემოდგომო სესიას დახურავს. ამ ეტაპზე უცნობია, შეიკრიბება თუ არა ახალარჩეული პარლამენტი რიგგარშე სხდომების ფორმატში.

პარლამენტის რეგლამენტის მიხედვით, საშემოდგომო სესია დეკემბრის მესამე პარასკევს უნდა დაიხუროს, თუმცა როგორც პარლამენტის თავმჯდომარემ შალვა პაპუაშვილმა განაცხადა, საშემოდგომო სესიას 13 დეკემბერს დახურავენ.

მიმდინარე კვირას პარლამენტმა გადაწყვეტილებები დაჩქარებული წესით მიიღო. 13 დეკემბრის სხდომაზე საბოლოოდ დაამტკიცებენ “ქართული ოცნების“ კანონის პროექტებს, რომელიც შეეხება დემონსტრაციაზე ნიღბების ტარებისა და სახის დამალვის აკრძალვას, პიროტექნიკისა და ლაზერული მოწყობილობების გამოყენებას, პოლიციელად მუშაობის დაწყებისა და საჯარო სამსახურებში რეორგანიზაციის ჩატარების პროცესის გამარტივებას.