„ქართული ოცნება“ თავიდან ბოლომდე პერფორმანსშია - ამის შესახებ საქართველოს მეოთხე პრეზიდენტმა, გიორგი მარგველაშვილმა „პალიტრანიუსის“ გადაცემაში „360 გრადუსი“ განაცხადა. სალომე ზურაბიშვილმა უპასუხა კითხვას, რამდენად შესაძლებელია, ხალხს სალომე ზურაბიშვილი ფიზიკურად დასაცავი გაუხდეს, 29 დეკემბრის შემდეგ.

“მახსოვს, როდესაც მე შევედი საპრეზიდენტო სასახლეში, დავიკავე სასახლე, მეკავა ბოლომდე და არ დავთმე, ანალოგიური შემოთვლები იყო ჩემს მიმართ და ჩემი პოზიცია ყოველთვის იყო მათ მიმართ, რომ აბა, სინჯეთ და აბა სცადეთ და ზუსტად ვიცოდი, მიუხედავად იმისა, რომ მაშინ ასეთი ტალღა არ იყო, ზუსტად ვიცოდი, რომ საქართველოს ნებისმიერი მოქალაქე დადგებოდა არა ჩემი, არამედ ქვეყნის ღირსების დასაცავად, ასე, რომ ვნახოთ…

ვნახოთ, რა პერფორმანსებს დადგამენ. პერფორმანსში არიან თავიდან ბოლომდე, პერფორმანსია მათი პრემიერობა, მინისტრობა, დეპუტატობა და ვნახოთ, რა შემოქმედებითი შესაძლებლობები გააჩნიათ ამ ინდივიდებს.

მე პრეზიდენტის სასახლიდან გამომიყვანეს? ხომ ვერ გამომიყვანეს. ძალიან კარგად ვიღებდი დელეგაციებს, მათ შორის, სალომე ზურაბიშვილი რომ იქნა არჩეული, მივიღე ქალბატონი სალომე, ხომ ვიყავი ბოლომდე? და ეს დაიწყო პირველივე დღიდან, როცა შევედი მაგ შენობაში. ხუთი წელიწადი იქ ვიყავი და ვერავინ ვერაფერი გაბედა”, - განაცხადა გიორგი მარგველაშვილმა.

მეოთხე პრეზიდენტმა ასევე შეაფასა საფრანგეთის პრეზიდენტის, ემანუელ მაკრონის სატელეფონო ზარი ბიძინა ივანიშვილთან. მისი აზრით, საფრანგეთის პრეზიდენტი დიდ რისკზე წავიდა, როდესაც დაურეკა ადამიანს, რომლის ოფიციალური რეგალია ხელისუფლებაში არ არსებობს.

“ემანუელ მაკრონისგან ზარი იყო მოლოდინს ზემოთ. მე არ მოველოდი, რომ საქართველოს სახელმწიფოთი დაინტერესდებოდა, მიუხედავად ჩვენი მნიშვნელობისა, გაეროს უშიშროების საბჭოს მუდმივი წევრი ქვეყანა და ამ ქვეყნის არა საგარეო საქმეთა მინისტრი, არა რომელიმე წარმომადგენელი, არამედ პრეზიდენტი ამ ქვეყნის დაურეკავდა ადამიანს, რომლის ტიტულატურაც ჩვენ არ ვიცით. ვინ არის ეს ადამიანი, ჩვენ არ ვიცით - საველე მეთაურია, ატამანია, უფროსია - ვინ არის. წარმოიდგინეთ, რამდენად დიდ ნაბიჯზე წავიდა საფრანგეთის რესპუბლიკის პრეზიდენტი, უაღრესად მნიშვნელოვანი სახელმწიფოს მეთაური, რომელმაც დაურეკა ადამიანს, რომლის ტიტულატურაც არ იშიფრება.

მე არ ვიცი, როგორ არის ეს იმ ჩანაწერებში, რომელიც საფრანგეთის საგარეო საქმეთა სამინისტროში არის ამ ზართან მიმართებაში, მაგრამ ვის დაურეკა, ბოსს? ბოსია?

ამხელა რისკზე წავიდა საფრანგეთის რესპუბლიკის პრეზიდენტი. ერთადერთი პასუხი ამაზე არის ის, რომ უაღრესად დიდი ზრუნვა და ჩართულობაა საქართველოს მოქალაქეების მიმართ და მადლიერებიც ვართ, რომ ის დავიდა ამ დონემდე, რომ ამ ადამიანს ელაპარაკოს”, - განაცხადა მარგველაშვილმა.