ბათუმის ხელოვნების უნივერსიტეტში სტუდენტებმა აქცია-პერფორმანსი გამართეს და დაკავებულ დეკანს და ოთხ სტუდენტს სოლიდარობა გამოუცხადეს
ბათუმის ხელოვნების უნივერსიტეტში სტუდენტებმა აქცია-პერფორმანსი გამართეს.
სტუდენტებმა დაკავებულ დეკანს და ოთხ სტუდენტს სოლიდარობა გამოუცხადეს. მათ იმედი აქვთ, რომ „სიმართლე გაიმარჯვებს და დაკავებულები დროულად გათავისუფლდებიან“. სტუდენტებმა სიმბოლურად სიჩუმის წუთები მოაწყვეს.
“თავისუფლება უდანაშაულო ბიჭებს, რომლებიც არიან ხელოვანები და ინტელექტუალები. განათლების გარდა, ეს ბიჭები არიან უპატიოსნესი, მოწესრიგებული ადამიანები. ამ ბიჭების ციხეში ყოფნა, ძალიან დიდი ტკივილია. ჩვენ სათქმელი არაფერი გვაქვს გარდა ერთისა, თავისუფლება მათ. ჩვენ ამ ღონისძიებაზე გამოვფინეთ ბიჭების სამუშაო ინსტრუმენტები სიმების გარეშე, რომლებზეც დაკვრას ვერ შევძლებთ. სალექციო სივრცე კი ბატონი მამუკას გარეშე წარმოვადგინეთ. ასევე, ყველა დაპატიმრებულის ნამუშევრები წარმოვადგინეთ, მათ შორის მათი წერილები. პერფორმანსი ახალგაზრდა რეჟისორებმა დადგეს”, - განაცხადა სტუდენტმა საბა ოკუჯავამ.
ცნობისთვის, ბათუმის ხელოვნების უნივერსიტეტის დეკანს, მამუკა ჯორბენაძეს და ოთხ სტუდენტს სასამართლომ აღკვეთის ღონისძიების სახით პატიმრობა შეუფარდა. გამოძიების ინფორმაციით, ლექტორი და სტუდენტები, ბათუმში ჯგუფურად ჩადენილი ძალადობის ბრალდებით, მოსამართლის განჩინების საფუძველზე, რამდენიმე დღის წინ დააკავეს.
