საქართველოს კორუმპირებულ ელიტასა და ლიდერებს ქართველებისთვის კორუმპირებული რუსული მმართველობა, ხოლო საკუთარი თავისთვის ევროპა სურთ, - ამის შესახებ საქართველოს პრეზიდენტმა სალომე ზურაბიშვილმა ევროპარლამენტში განაცხადა.

„ახალი არჩევნები ასევე გზაა, რომლითაც ევროპას შეუძლია ჩვენი მხარდაჭერა. გვჭირდება, რომ ევროპამ მხარი დაუჭიროს ამ მოწოდებას, როგორც ერთ-ერთ წინმიმავალ მშვიდობიან გზას. სხვა გზა არ არსებობს, არანაირი ცვლილებები კანონმდებლობაში, არანაირი “სახის შემანარჩუნებელი” შეთანხმებები.

ვიცით, რომ ამ რუსული მოდელის ხელმძღვანელობას შეუძლია ერთი ნაბიჯის წინ გადადგმა, ორის უკან ან ორი ნაბიჯის უკან გადადგმა და ერთის წინ - არ მახსოვს რა იყო ლენინის ფორმულა, მაგრამ ისინი ამას პრაქტიკაში ატარებენ საკმაოდ წარმატებულად.

ასე რომ, ძალიან მკაფიო და ძალიან პრინციპულები უნდა ვიყოთ, ასეთივე იქნება საქართველოს მოსახლეობა. ან მივდივართ არჩევნებზე ან მივდივართ არ ვიცით სად, მაგრამ რაც ნამდვილად იქნება კრიზისია, რომელთან გამკლავებაც ჩვენ, თქვენ გაცილებით უფრო საზარელ პირობებში მოგვიწევს.

თქვენი ბერკეტები უნდა გამოიყენოთ და გეოპოლიტიკური ევროპა იყოთ. ევროპა საქართველოს უდიდესი დონორია, საქართველოს უდიდესი ბაზარია, საქართველოს უდიდესი დიასპორის სახლია. ევროპამ უნდა იპოვოს სამოქმედო ბერკეტი. თუ ევროპა ვერ შეძლებს 3.7 მილიონიან ქვეყანაზე ბერკეტის გამოყენებას, როგორ შეუძლია 21-ე საუკუნის გიგანტებთან შეჯიბრი?

ევროპას პერსონალური გავლენა აქვს, ის ასევე საყვარელი დანიშნულების ადგილია საქართველოს კორუმპირებული ელიტისთვისა და ლიდერებისთვის. ისინი პოსტ-საბჭოური რუსული მმართველობის იმპორტს ახდენენ საქართველოში, მაგრამ ბედნიერები არიან შეინახონ და დახარჯონ თავიანთი ფული ევროპაში. და მათ ქართველებისთვის კორუმპირებული რუსული მმართველობა, ხოლო საკუთარი თავისთვის ევროპა სურთ“,- განაცხადა ზურაბიშვილმა.