ირაკლი კობახიძე - ლორა თორნტონი სერიოზული ადამიანი არ არის, რაც შეეხება „მაკკეინის ინსტიტუტს“, აქაც პირდაპირ „დიფ სთეითის“ გამოვლინებაა - ეს ადამიანები ვერ ეგუებიან, რომ ხელისუფლებაში კოლექტიური „ნაცმოძრაობა“ ვერ დააბრუნეს, თუმცა მოუწევთ, შეეგუონ ბედს
ლორა თორნტონი სერიოზული ადამიანი არ არის, შესაბამისად მასზე სერიოზულ კომენტარს ვერ გავაკეთებ, თუმცა რაც შეეხება „მაკკეინის ინსტიტუტს", აქაც არის პირდაპირ „დიფ სთეითის" გამოვლინება, - ამის შესახებ საქართველოს პრემიერ-მინისტრმა ირაკლი კობახიძემ პრესკონფერენციაზე განაცხადა.
კობახიძის შეფასებით, ეს ადამიანები ვერ ეგუებიან იმას, რომ ხელისუფლებაში კოლექტიური „ნაცმოძრაობა" ვერ დააბრუნეს.
„ისინი ვერ ეგუებიან იმას, რომ ხელისუფლებაში ვერ დააბრუნეს ადამიანები, რომლებიც 2012 წლამდე გამოირჩეოდნენ წამებით, მკვლელობით, ბიზნესის რეკეტით, ხელისუფლების მიერ რუსეთისთვის ტერიტორიების ჩაბარებით და ა.შ. ვერ შეეგუენ იმას, რომ ამ ძალებმა ვერ დაიბრუნეს ხელისუფლება, ძალაუფლება, თუმცა მათ მოუწევთ, შეეგუონ ბედს, ზუსტად ისევე, როგორც ამის გაკეთება მოუწევს რადიკალურ ოპოზიციას", - აღნიშნა ირაკლი კობახიძემ.
