ბიძინა ივანიშვილი მარტოც რომ მოვიდეს, არა უშავს, მეც მარტო ვიქნები და ვილაპარაკოთ, ამისთვის გვაქვს ძალიან ცოტა დრო იმიტომ, რომ კრიზისი აღარ ითმენს - შევხვდეთ ამ კვირაში, 29 რიცხვამდე, - ამის შესახებ საქართველოს პრეზიდენტმა სალომე ზურაბიშვილმა განაცხადა.

სალომე ზურაბიშივლმა კიდევ ერთხელ გამოთქვა მზაობა ბიძინა ივანიშვილი მიიღოს ორბელიანების სასახლეში.

პრეზიდენტმა ისაუბრა შექმნილი ვითარებიდან გამოსავალის ვარიაციებზე:

„დარჩა მხოლოდ და მხოლოდ ახალი არჩევნების დანიშვნა და ეს არის ხალხის მოთხოვნა, ჩემი მოთხოვნა, პოლიტიკური პარტიების მოთხოვნა.

სადაც ვიმყოფებით ჩვენ, რჩება ორი გამოსავალი - ერთია, მივაღწიოთ ამ არჩევნებს უმოკლეს დროში და იმ პირობებში, რომელიც აღადგენს ამომრჩევლების ნდობას. მივაღწიოთ შეთანხმებას მმართველ გუნდთან იმაზე, რომ ჩატარდება ეს არჩევნები დათქმულ ვადაში.

დიალოგი ჩემთან უნდა იყოს და არა საზოგადოების ცალკეულ პირებთან, რომელიც თავისთავად არ არის აკრძალული და შეიძლება, კარგიც იყოს, მაგრამ ამ საკითხზე დიალოგი უნდა იყოს ჩემთან, როგორც მედიატორთან და მათთან, ვინც მონაწილეობდა ამ არჩევნებში - პარტიები, დამკვირვებლები და ა.შ.

მეორე მხარეს უნდა იყოს ბიძინა ივანიშვილი და რამდენიმე წარმომადგენელი მისი პარტიის, რამდენსაც ის ისურვებს. პრინციპში, მარტოც რომ მოვიდეს, არა უშავს, მეც მარტო ვიქნები და ვილაპარაკოთ. ამისთვის გვაქვს ძალიან ცოტა დრო იმიტომ, რომ ეს კრიზისი აღარ ითმენს და თუ ამ კვირაში მოვიდა იმ აზრზე, რომ ამ ქვეყანას უნდა გავუფრთხილდეთ, ამ საზოგადოებას უნდა გავუფრთხილდეთ, დავაწყნაროთ და მივცეთ მშვიდობის გასაღები, მაშინ რატომღა გადავდოთ, შევხვდეთ ამ კვირაში, 29 რიცხვამდე. მე მზად ვარ და მივიღებ ნებისმიერ ფორმაში.

თუ არ იქნა მიღწეული ეს კომპრომისული ვარიანტი, ეს დიალოგი, არის მეორე ვარიანტიც - მივალთ არჩევნებამდე ამ რეჟიმის ჩამოშლით, სხვა გზა არ არის. უკვე იშლება ეს რეჟიმი. ეს არის ალტერნატივა - ან დიალოგი, კომპრომისი, დათმობა თუ არა და ეს არის რეჟიმის ჩამოშლა.

ეს რეჟიმი თავისით იშლება და არავის ხელი არ ურევია, ეს არის თქვენი ბრალი, ვინც ხართ ძალაუფლებაში იმიტომ, რომ დროზე ვერ მოხვედით გონზე და ვერ დაინახეთ, ამ ქვეყანას როგორ უნდა მოეპყროთ”, - განაცხადა პრეზიდენტმა.