ჩვენი გეოპოლიტიკური მდებარეობა და მნიშვნელობა ყველას უნდა გვქონდეს გააზრებული. პოლიტიკოსები, რომლებიც თავისი სამშობლოს შესახებ იღებენ გადაწყვეტილებებს, პირველ რიგში, მათ გააზრებული უნდა ჰქონდეთ სად ვცხოვრობთ , - ამის შესახებ „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ განაცხადა.

როგორც მამუკა მდინარაძემ აღნიშნა, საქართველო სტრატეგიული გეოპოლიტიკური მნიშვნელობის ქვეყანაა და როცა ამას გავიაზრებთ, მერე მივხვდებით, რომ „ სახვეწარი არავისთან არაფერი გვჭირს”.

მისივე თქმით, როდესაც გეოპოლიტიკაზე ვსაუბრობთ, საქართველომ უნდა იცოდეს თავისი პოლიტიკური ფასი.

„საქართველოსთვის გეოგრაფია არ არის შემაფერხებელი, პირიქით, ერთი მხრივ ის ევროპის ნაწილია. მეორე მხრივ, ჩვენ ჩვენს მეგობარ, მეზობელ პარტნიორ ქვეყნებს, კარგად ვიცნობთ მათ დანიშნულებასაც და ფუნქციასაც კარგად ვიცნობთ. მაგალითად, აზერბაიჯანი და სომხეთი - ძალიან მნიშვნელოვანი მდებარეობაა მათი, მათ შორის, გეოპოლიტიკური. ჩვენ კიდევ უფრო მნიშვნელოვანი მდებარეობა გვაქვს და ნუ წარმოვიდგენთ ისე, რომ ჩვენ ვიღაც ძალიან გვჭირდება და ეს ვიღაცა რაც არ უნდა პატივსაცემი ორგანიზაცია, პირთა ჯგუფი თუ სახელმწიფო და გაერთიანება იყოს, ჩვენც უნდა ვიცოდეთ და გადაწყვეტილებებიც როგორ მივიღოთ გაგვიადვილდება, რომ ვართ ძალიან მნიშვნელოვანი, მათ შორის, სტრატეგიული გეოპოლიტიკური მნიშვნელობის ქვეყანა. როგორც კი ამას ჩვენ გავიაზრებთ და გავათვიცნობიერებთ, მერე მივხვდებით, რომ ჩვენ სახვეწარი არავისთან არაფერი გვჭირს. უნდა ვიცოდეთ, რომ ჩვენი მნიშვნელობა არის დიდი, არა მხოლოდ იმით, რაზეც მაგალითად, შალვა პაპუაშვილი, ირაკლი კობახიძე, ბევრი ჩვენგანი ძალიან ბევრჯერ ვსაუბრობთ, რომ ჩვენი იდენტობა, ჩვენი კულტურა, ეროვნული ბევრი თვისება, რაზეც ასე ვიბრძვით და რაც სამწუხაროდ საბრძოლველი გახდა, ეს საჭიროებაც აქვს დღეს ევროპას და ევროპელებს. არ შეიძლება, რომ იდენტობის საკითხთან დაკავშირებით ჩვენ საჭიროებაზე არ ვილაპარაკოთ, ეს სხვა საკითხია, მაგრამ თუკი გეოპოლიტიკაზე ვლაპარაკობთ ჩვენ უნდა ვიცოდეთ ჩვენი პოლიტიკური ფასი“ , - განაცხადა მამუკა მდინარაძემ „იმედთან“.