რაც შეეხება პარლამენტის დათხოვნა-არდათხოვნას და ასეთ უაზრო იდეებს, იგივე წარმატებით ქალბატონ სალომეს შეუძლია მსოფლიო ჩემპიონატი დანიშნოს თბილისში - ასეთივე სამართლებრივი ძალა ექნება ამ გადაწყვეტილებას, - ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.

მისივე შეფასებით, „კოალიცია ცვლილებისთვის“ ერთ-ერთი ლიდერი, ნიკა გვარამია, რომელიც პრეზიდენტს ვადამდელი არჩევნების შესახებ აქტის გამოცემას ურჩევს, კიდევ ერთხელ ადასტურებს, რომ „იურისპრუდენციის გაგნებაში არ არის და ამ სისულელეს საბოლოო ჯამში, თავად სალომე ზურაბიშვილსაც ვერ აჯერებს“.

პაპუაშვილის თქმით, 29 დეკემბერს იქნება ინაუგურაცია და „საქართველოს ეყოლება ღირსეული პრეზიდენტი“.

„მე მგონი, ნიკა გვარამია უკვე მერამდენედ ადასტურებს, რომ იურისპრუდენციის გაგნებაში არ არის. რამდენჯერ გამოდის, იტყვის დიდ სისულელეს და ამ სისულელეს ვხედავთ, რომ თავად სალომე ზურაბიშვილსაც ვერ აჯერებს, საბოლოო ჯამში. ვინ რამდენ სისულელეს იტყვის ყველაფერზე კომენტარი რომ ვაკეთოთ, დროს დავკარგავთ, მაგრამ ფაქტი სახეზეა - 29 დეკემბერს იქნება ინაუგურაცია და საქართველოს ეყოლება ღირსეული პრეზიდენტი, რომელსაც ექნება რთული ამოცანა, რომ ის ზიანი იქნას აღმოფხვრილი, რაც ქვეყნის შიდა და გარე მტრებმა პრეზიდენტის ინსტიტუტს ერთობლივად მიაყენეს და ამ ინსტიტუტს დაუბრუნდეს ის პრესტიჟი, რომელიც მას უნდა ჰქონდეს. რაც შეეხება პარლამენტის დათხოვნა-არდათოხვნას და ასეთ უაზრო იდეებს, იგივე წარმატებით ქალბატონ სალომეს შეუძლია მსოფლიო ჩემპიონატი დანიშნოს თბილისში. ასეთივე სამართლებრივი ძალა ექნება ამ გადაწყვეტილებას,“ - განაცხადა პაპუაშვილმა.